صوبہ خیبرپختونخواہ میں سکیورٹی فورسز کی 2 کارروائیوں میں 8 خارجی دہشتگرد ہلاک ہوگئے۔
پاک فوج کے شعبہ تعلقات عامہ ( آئی ایس پی آر ) کے مطابق سکیورٹی فورسز نے صوبہ خیبر پختونخواہ میں دو مختلف کارروائیاں کی ہیں جس کے دوران 8 خارجی مارے گئے ہیں جب کہ 9 زخمی ہوئے، 2 خارجیوں کو گرفتار کیا گیا ہے۔آرمی ترجمان نے بتایا کہ سکیورٹی فورسز نے ایک آپریشن بنوں کے علاقے بکاخیل میں کیا، اس کارروائی میں 5 خارجی مارے گئے اور 9 زخمی ہوئے جب کہ سکیورٹی فورسز نے دوسری کارروائی خیبر کے علاقے شگنی میں کی جہاں 3 خارجی مارے گئے جب کہ 2 گو گرفتار کر لیا گیا، ہلاک تمام خارجی دہشت گردی کی متعدد کارروائیوں میں ملوث تھے۔آئی ایس پی آر کا کہنا ہے کہ علاقے میں ممکنہ خارجیوں کے خاتمے کے لیے کلیئرنس آپریشن کیا، سکیورٹی فورسز ملک سے دہشتگردی کے خاتمے کیلیے پُرعزم ہیں اور بہادر جوانوں کی قربانیاں ہمارے عزم کو مزید تقویت دیتی ہیں، ان آپریشنز کے دوران فائرنگ کے تبادلے میں بنوں میں سپاہی افتخار حسین اور خیبر کے علاقے شگنی میں کیپٹن محمد ذوہیب الدین بہادری سے لڑتے ہوئے شہید ہوئے۔بتایا گیا ہے کہ 26 سالہ کیپٹن محمد ذوہیب شہید کا تعلق لاہور سے ہے انہوں نے 3 سال سے زائد عرصے تک پاک فوج میں فرائض سر انجام دیئے جب کہ 29 سالہ سپاہی افتخار حسین شہید کا تعلق ضلع جھنگ سے ہے اور انہوں نے 8 سال تک پاک فوج میں دفاع وطن کی خدمات سر انجام دیں، سپاہی افتخار حسین شہید نے سوگواران میں اہلیہ، بیٹا اور بیٹی شامل ہیں۔
چین کا تائیوان کو ہتھیاروں کی فروخت کی امریکی منظوری پر شدید ردعمل
