لال مسجد پر طالبات کے قبضے کا انکشاف،لال مسجد کا وکیل بھی عدالت میں پھٹ پڑا
باغی ٹی وی کی رپورٹ کے مطابق لال مسجد اور اطراف کی سڑکوں کی بندش کا معاملہ،اسلام آباد ہائیکورٹ میں لال مسجد اور اطراف کی سڑکوں کی بندش کے خلاف درخواست پر سماعت ہوئی
سماعت اسلام آباد ہائیکورٹ کے چیف جسٹس اطہرمن اللہ نے کی،پٹیشنر کی جانب سے طارق اسد ایڈووکیٹ عدالت میں پیش ہوئے،ڈپٹی کمشنر اسلام آباد حمزہ شفات اور ایس ایچ او تھانہ آبپارہ بھی عدالتی حکم پر عدالت میں پیش ہوئے
جسٹس محسن اختر کیانی نے ڈپٹی کمشنر سے استفسار کیا کہ لال مسجد کیوں بند ہے، جس پر ڈپٹی کمشنر نے کہا کہ جامعہ حفصہ کی تیس/چالیس طالبات نے لال مسجد کے ایک حصے پر قبضہ کر رکھا ہے،کچھ وقت لال مسجد بند تھی لیکن اب نمازوں کے لئے کھول دی گئی ہے،
جسٹس محسن اختر کیانی نے کہا کہ لال مسجد کے اطراف سڑکیں کیوں بند ہیں، جس پر ڈپٹی کمشنر نے کہا کہ سیکیورٹی ایشوز کی وجہ سے لال مسجد کے اطراف کی ایک سڑک بند ہے، جسٹس محسن اختر کیانی نے ریمارکس دیتے ہوئے کہا کہ لال مسجد کے اندر طالبات کا کیا کام ہے، جس پر ڈپٹی کمشنر نے کہا کہ ہم پرامن طریقے سے مسئلے کے حل کے لئے جامعہ حفصہ کی انتظامیہ سے مذاکرات کر رہے ہیں، ہمیں پرامن طریقے سے مسئلے کے حل کے لئے چالیس سے پچاس روز کی مہلت دی جائے،
جسٹس محسن اختر کیانی نے استفسار کیا کہ طارق اسد صاحب شہداء فاؤنڈیشن اس مسئلے کو حل کیوں نہیں کروا رہی، شہداء فاؤنڈیشن جامعہ حفصہ کی انتظامیہ سے بات چیت کرکے جامعہ حفصہ کی طالبات کو لال مسجد سے واپس بلوائے، طارق اسد ایڈوکیٹ نے کہا کہ شہداء فاؤنڈیشن شہدائے لال مسجد کے ورثاء نے بنائی،ہمارا موقف ہے کہ لال مسجد پر طالبات کا چند لڑکوں کے ساتھ قبضہ کرنا غلط ہے،13 سال سے میں لال مسجد والوں کا وکیل ہوں، مگر میں لال مسجد پر طالبات کے قبضے کو درست نہیں سمجھتا، لال مسجد میں طالبات کا کوئی عمل دخل نہیں ہونا چاہے، لال مسجد کے اندر طالبات کے ساتھ موجود ان لڑکوں کے خلاف کارروائی ہونی چاہے جو امن و امان کا مسئلہ پیدا کر رہے ہیں، لال مسجد کا امام اس وقت یعقوب غازی بنا ہوا ہے، جس کے خلاف کریمنل کیسز درج ہیں،لال مسجد کا امام اس وقت جو بنا ہوا ہے وہ اتنے بڑے منبر پر بیٹھنے کا اہل نہیں ہے، لال مسجد میں چند طالبات کی موجودگی کی وجہ سے اطراف کی سڑکیں بند ہیں، جس سے شہریوں کا آئینی حق متاثر ہو رہا ہے،
ڈپٹی کمشنر نے کہا کہ لال مسجد اوقاف کی ہے، انتظامیہ کو اس مسئلے کے حل کے لئے کچھ مہلت دی جائے،عدالت نے وفاقی انتظامیہ کو لال مسجد پر سے جامعہ حفصہ کی طالبات کا قبضہ ختم کرانے کے لئے یکم دسمبر تک کی مہلت دے دی،عدالت نے حکم دیا کہ یکم دسمبر سے قبل قانون کے مطابق اس مسئلے کو حل کریں،
