ڈیرہ غازی خان(باغی ٹی وی،سٹی رپورٹرجواداکبر) چٹ سرکانی روڈ، جو چوٹی اور اس کے گرد و نواح کے متعدد دیہات کو آپس میں ملانے والا ایک اہم راستہ ہے، حال ہی میں پختہ تو کر دیا گیا ہے، لیکن یہاں ایک بڑا مسئلہ اب بھی برقرار ہےکہ وڈور نالے پر پل نہ ہونے کی وجہ سے مقامی آبادی اور مسافروں کو شدید مشکلات کا سامنا ہے۔
اس نالے پر آج تک پل تعمیر نہیں ہو سکا جس کی وجہ سے بارش یا نالے میں پانی آنے پر راستہ مکمل طور پر بند ہو جاتا ہے۔ اس صورتحال میں مریضوں، طالب علموں، خواتین اور بزرگوں کو شدید پریشانی کا سامنا کرنا پڑتا ہے، اور ہنگامی صورتحال میں بروقت مدد بھی ممکن نہیں ہو پاتی۔
مقامی افراد کا کہنا ہے کہ "جب سڑک بن سکتی ہے تو پل کیوں نہیں؟” ان کا مطالبہ ہے کہ ڈور پل کی تعمیر اب وقت کی ضرورت بن چکی ہے، اور متعلقہ حکام کو چاہیے کہ وہ فوری طور پر اس پر توجہ دیں۔ ایک پختہ پل کی تعمیر سے نہ صرف سفر میں آسانی ہوگی بلکہ مقامی آبادی کی روزمرہ زندگی میں بھی بہتری آئے گی اور انہیں ایک محفوظ اور آسان راستہ ملے گا۔
