بھارتی حملوں کے بعد پاکستان کی فضائی حدود میں بے چینی: کراچی ایئرپورٹ پر پروازیں لینڈ کرائی جا رہی ہیں
آج بھارت کی جانب سے آزاد کشمیر اور پاکستان میں بزدلانہ میزائل حملوں کے بعد پاکستان کی فضائی حدود میں بے چینی کی صورتحال پیدا ہو گئی ہے۔ لاہور، اسلام آباد، اور سیالکوٹ سمیت دیگر شہروں سے آنے والی پروازوں کو فوری طور پر کراچی ایئرپورٹ پر لینڈ کرایا جا رہا ہے تاکہ فضائی آپریشن کو محفوظ بنایا جا سکے۔ذرائع کے مطابق، بھارتی میزائل حملوں کے بعد پاکستان کی فضائی حدود میں موجود تمام پروازوں کا رخ تبدیل کر دیا گیا ہے۔ اس دوران، کراچی کی فضائی حدود کمرشل پروازوں کے لیے کھول دی گئی ہے تاکہ دیگر ائیرپورٹس پر فضائی آپریشن متاثر نہ ہو۔ اس کے علاوہ، مختلف بین الاقوامی پروازیں جو پاکستان کی فضائی حدود سے گزر رہی تھیں، ان کا رخ بھی کراچی کی جانب موڑ دیا گیا۔
سعودی ائیرلائن کی جدہ سے اسلام آباد جانے والی پرواز اور جدہ سے لاہور جانے والی پروازوں کو بھی کراچی ایئرپورٹ پر لینڈ کرایا گیا ہے۔ اسی طرح، ابوظبی سے نئی دہلی جانے والی اتحاد ایئر لائن کی پرواز (جو پاکستانی فضائی حدود میں تھی) بھی کراچی کی جانب موڑ دی گئی۔سیالکوٹ انٹرنیشنل ایئرپورٹ کے ترجمان نے کہا ہے کہ موجودہ ملکی سلامتی کی صورتحال کے پیش نظر اور حکومت پاکستان کے احکامات کی بناء پر سیالکوٹ انٹرنیشنل ایئرپورٹ کو اگلے نوٹس تک تمام فلائٹ آپریشنز کے لیے عارضی طور پر بند کر دیا گیا ہے۔ اس فیصلے کا مقصد فضائی سلامتی کو یقینی بنانا ہے۔
دوسری جانب، پاکستان کی قومی ائیرلائن (پی آئی اے) نے آج کی تمام پروازوں کو منسوخ کرنے کا اعلان کیا ہے۔ نجی فضائی کمپنیوں نے بھی کراچی سے آپریٹ ہونے والی تمام پروازیں منسوخ کر دی ہیں۔ اس صورتحال کے پیش نظر، مسافروں کو کراچی ایئرپورٹ پر روک لیا گیا ہے اور انہیں متبادل انتظامات کے تحت روانہ کیا جا رہا ہے۔
