ڈی جی خان میں پنجاب کے پی سرحد کی لاکھانی چیک پوسٹ پر رات گئے دہشتگردوں نے حملہ کیا۔
باغی ٹی وی : پولیس کاکہنا ہے کہ 25سے زائد دہشتگردوں نے چیک پوسٹ پر راکٹ اور دستی بموں سے حملہ کیا،حملے میں کوئی جانی نقصان نہیں ہوا، جوابی کارروائی پر دہشتگردفرارہوگئے۔
ترجمان پنجاب پولیس کے مطابق ڈیرہ غازی خان کے تھانہ وہوا کی سرحدی چوکی لکھانی پر خوارجی دہشت گردوں نے رات دیر گئے حملہ کردیا، خوارجی دہشت گردوں نے راکٹ، دستی بموں سمیت بھاری اسلحے کا استعمال کیا 25 سے 30 خوارجی دہشت گرد لکھانی چیک پوسٹ پر چاروں طرف سے حملہ آور ہوئے تاہم پنجاب پولیس نے خوارجی دہشت گردوں کے عزائم خاک میں ملا دیے اور حملہ آور پسپا ہو کر فرار ہوگئے۔
ترجمان نے کہا کہ تھرمل امیج کیمروں کی مدد سے خوارجی دہشت گردوں کی نشاندہی کی گئی، پولیس، ایلیٹ فورس، رینجرز اور سی ٹی ڈی نے مل کر خوارجی دہشت گردوں کا مقابلہ کیا، پولیس کی جوابی کاروائی نے دہشت گردوں کو فرار پر مجبور کر دیا، موثر جوابی کارروائی کے نتیجے میں دہشت گرد بھاری جانی نقصان اٹھا کر فرار ہو گئے، خیبرپختونخوا بارڈر پر تمام چیک پوسٹس پہلے سے ہائی الرٹ تھیں۔
آئی جی پنجاب عثمان انور نے دہشت گردوں کا حملہ پسپا کرنے پر ڈیرہ غازی خان پولیس کو شاباش دیتے ہوئے کہا کہ پنجاب پولیس قبل ازیں بھی خوارجی دہشت گردوں کے کئی حملے ناکام بنا چکی ہے، دہشت گردوں کو کسی بھی صورت پنجاب میں داخل ہونے نہیں دیا جائے گا۔
دوسری جانب خیبرپختونخوا کے ضلع بنوں کینٹ پر نامعلوم حملہ آوروں نے حملہ کردیاسیکیورٹی فورسز اور شرپسندوں کے مابین شدید فائرنگ کا تبادلہ ہوا تاہم فائرنگ کے نتیجے میں کوئی جانی نقصان کی اطلاع نہیں، حملہ آوروں نے دریا کرم کی طرف سے فائرنگ کی جبکہ سیکیور ٹی فورسز کی جوابی کارروائی سے حملہ آور فرار ہوگئے۔
