لنڈی کوتل،باغی ٹی وی (نامہ نگارمہدشاہ شنواری) دارالعلوم اسلامیہ فاروقیہ شاکس امن اور اصلاح معاشرہ کا رول ماڈل، جسٹس عامر نذیر
تفصیل کے مطابق باجوڑ سیشن کورٹ کے جج جسٹس عامر نذیر نے کہا ہے کہ دارالعلوم اسلامیہ الفاروقیہ شاکس قیام امن اور اصلاح معاشرہ میں بنیادی کردار ادا کر رہا ہے۔ یہ جامعہ دینی، روحانی اور عصری علوم کے حسین امتزاج کے ساتھ دیگر مدارس کے لیے رول ماڈل کی حیثیت رکھتا ہے۔
جسٹس عامر نذیر نے ان خیالات کا اظہار ضلع خیبر کے علاقے شاکس میں دارالعلوم اسلامیہ الفاروقیہ کے سالانہ دستار بندی کی تقریب سے خطاب کرتے ہوئے کیا۔ ان کا کہنا تھا کہ معاشرتی امن کے قیام کے لیے عدل و انصاف کے نظام کو فروغ دینا اسلام کا بنیادی تقاضا ہے، اور دارالعلوم فاروقیہ گزشتہ کئی دہائیوں سے اس حوالے سے شاندار خدمات انجام دے رہا ہے۔
انہوں نے بتایا کہ یہ دارالعلوم نہ صرف دینی تعلیم فراہم کر رہا ہے بلکہ یتیم اور بے سہارا بچوں کو بین الاقوامی معیار کی عصری تعلیم، تربیت، اور مفت رہائش و خوراک بھی فراہم کرتا ہے۔ ہر سال یورپ، امریکہ اور دیگر ممالک میں موجود پاکستانیوں کے لیے آن لائن قرآن کلاسز کا بھی اہتمام کیا جاتا ہے، جو اس جامعہ کو دیگر مدارس سے ممتاز بناتا ہے۔
تقریب میں کامیاب طلباء کو اسناد تقسیم کی گئیں۔ امتحانات میں کامیاب ہونے والے 523 طلباء میں 121 نے حفظ قرآن، 388 نے ناظرہ، 3 نے آن لائن ناظرہ قرآن، اور 14 نے تفسیر القرآن کے امتحانات مکمل کیے۔
تقریب میں دیگر اہم مہمانوں میں ایڈیشنل آڈیٹر جنرل الف جان، ریجنل ڈائریکٹر ورلڈ ہیلتھ کے پی ڈاکٹر عبدالرحمٰن، اور ممبر این ایچ اے نارتھ محمد امجد خان شامل تھے۔ تقریب میں سیاسی، سماجی شخصیات، علماء کرام، اعلیٰ سرکاری حکام، علاقہ عمائدین اور سینکڑوں طلباء نے شرکت کی۔
جسٹس عامر نذیر نے کہا کہ دینی مدارس کو دارالعلوم اسلامیہ فاروقیہ شاکس کے نقش قدم پر چلتے ہوئے بیک وقت دینی اور عصری علوم کی ضروریات پوری کرنی چاہیے تاکہ یہ ادارے معاشرتی ترقی اور قیام امن میں مزید مؤثر کردار ادا کر سکیں۔
