ڈاکٹرغلام مصطفی بڈانی
لنڈی کوتل (باغی ٹی وی رپورٹ) خیبر کے علاقے میں پولیس نے بڑی کارروائی کرتے ہوئے منشیات اسمگلنگ کی کوشش ناکام بنا دی۔ چراوزگئے چیک پوسٹ پر ایک مشتبہ شخص کو روک کر اس کے قبضے سے 1500 گرام ہیروئن برآمد کر لی گئی، جبکہ ملزم کو گرفتار کر کے مقدمہ درج کر لیا گیا ہے۔
پولیس کے مطابق کارروائی سب انسپکٹر حاجت خان کی قیادت میں انجام دی گئی، جو ضلعی پولیس افسر (ڈی پی او) خیبر رائے مظہر اقبال کی ہدایت پر جاری انسدادِ منشیات مہم کا حصہ تھی۔ حاجت خان نے مقامی میڈیا کو بتایا کہ چیک پوسٹ پر سخت نگرانی کے دوران ایک شخص کو پیدل مشکوک انداز میں گزرتے ہوئے روکا گیا، جس کے قبضے سے بھاری مقدار میں ہیروئن برآمد ہوئی۔
گرفتار ملزم کا تعلق ذخہ خیل سے ہے، جسے موقع پر ہی حراست میں لے کر مقامی تھانے منتقل کر دیا گیا۔ پولیس نے ملزم کے خلاف منشیات ایکٹ کے تحت مقدمہ درج کر کے تفتیش کا دائرہ وسیع کر دیا ہے تاکہ اس کے ممکنہ نیٹ ورک اور معاونین تک بھی رسائی حاصل کی جا سکے۔
ڈی پی او رائے مظہر اقبال نے پولیس ٹیم کی بروقت کارروائی کو سراہتے ہوئے کہا کہ منشیات فروشوں کے خلاف بلا امتیاز آپریشن جاری رہے گا۔ ان کا کہنا تھا کہ نوجوان نسل کو منشیات کے زہر سے بچانے کیلئے ہر ممکن اقدام اٹھایا جائے گا اور معاشرے کو اس ناسور سے پاک کرنے کیلئے پولیس کسی دباؤ یا مصلحت کا شکار نہیں ہو گی۔
