لنڈی کوتل (مہد شاہ شینواری کی رپورٹ) ہوائی فائرنگ سے صحافی کی بہن شدید زخمی، ہسپتال میں سہولیات کا فقدان، پشاور منتقل
عید کی رات لنڈی کوتل کے مختلف علاقوں میں شادی بیاہ اور خوشی کے مواقع پر ہوائی فائرنگ کا خطرناک سلسلہ جاری رہا، جس کے نتیجے میں صحافی نصیب شاہ شینواری کی بڑی بہن اور لنڈی کوتل بازار کے معروف ٹرانسفارمر مکینک حاجی ایوب شینواری کی اہلیہ شدید زخمی ہو گئیں۔
ذرائع کے مطابق خاتون کو بھائی خیل کے علاقے میں ہوائی گولی آ لگی، جس کے بعد انھیں فوری طور پر ڈی ایچ کیو ہسپتال لنڈی کوتل منتقل کیا گیا۔ تاہم حاجی ایوب شینواری نے شکایت کی کہ ہسپتال میں ایمرجنسی کے دوران ایکسرے سمیت دیگر بنیادی سہولیات میسر نہیں تھیں، جس کی وجہ سے مریضہ کو فوری طور پر پشاور ریفر کیا گیا۔
حاجی ایوب شینواری کے مطابق ایچ ایم سی حیات آباد کے ایمرجنسی یونٹ میں خاتون کو بہتر طبی سہولیات فراہم کی گئیں، ایکسرے کیا گیا اور ڈاکٹرز نے چند روز بعد سرجری کے ذریعے گولی نکالنے کا مشورہ دیا ہے۔
واقعے کے بعد صحافی نصیب شاہ شینواری نے اعلیٰ پولیس حکام سے مطالبہ کیا ہے کہ لنڈی کوتل اور آس پاس کے علاقوں میں ہوائی فائرنگ کے خلاف سخت قانونی کارروائی کی جائے تاکہ آئندہ ایسے افسوسناک واقعات سے بچا جا سکے۔
