لنڈی کوتل (باغی ٹی وی)تحصیل لنڈی کوتل کے جرگہ ہال میں ایک اہم کھلی کچہری کا انعقاد کیا گیا جس میں ضلع خیبر کے اعلیٰ حکام، بشمول کمانڈنٹ خیبر رائفلز، ڈپٹی کمشنر خیبر، ڈی پی او خیبر اور تمام سرکاری اداروں کے نمائندگان نے شرکت کی۔ اس موقع پر علاقہ عمائدین، مشران، بلدیاتی نمائندگان اور شہریوں کی بڑی تعداد بھی موجود تھی۔
کھلی کچہری کا مقصد عوامی مسائل براہِ راست سننا اور ان کے فوری حل کے لیے عملی اقدامات کرنا تھا۔ شہریوں نے بجلی، پانی، صحت، تعلیم، سڑکوں، منشیات، سرکاری دفاتر میں مسائل اور دیگر معاملات پر تفصیل سے گفتگو کی۔ ہر فرد کو موقع دیا گیا کہ وہ اپنے علاقے کے مسائل سے متعلقہ افسران کے سامنے براہِ راست شکایات اور تجاویز پیش کرے۔
ڈپٹی کمشنر خیبر نے خطاب کرتے ہوئے کہا کہ "کھلی کچہری کا مقصد صرف سننا نہیں بلکہ مسائل کا دیرپا حل تلاش کرنا ہے۔” انہوں نے یقین دہانی کرائی کہ تمام شکایات کو متعلقہ محکموں کو بھیجا جائے گا اور ان پر باقاعدہ کارروائی ہو گی۔
اس موقع پر عوامی نمائندوں نے کمانڈنٹ خیبر رائفلز اور ڈپٹی کمشنر خیبر کا خصوصی شکریہ ادا کیا کہ انہوں نے تمام اداروں کے افسران کو ایک ہی جگہ پر لا کر عوام کو اپنے مسائل براہِ راست بیان کرنے کا موقع دیا۔ شرکاء نے اس اقدام کو "قابلِ قدر اور مثبت پیش رفت” قرار دیا۔
کھلی کچہری کے اختتام پر عوام کی بڑی تعداد نے انتظامیہ سے مطالبہ کیا کہ اس طرح کے عوامی رابطہ اجلاس تسلسل سے منعقد کیے جائیں تاکہ سرکاری ادارے عوام کی دہلیز پر جوابدہ ہوں اور حقیقی مسائل کے حل کی راہ ہموار ہو۔
