لاہور: پولیس نے لڑکیوں کی تصاویر پر فحش گانے لگا کر ان کو بلیک میل کرنے والے ملزم کو گرفتار کرلیا ہے۔
پولیس کے مطابق، ملزم کا نام زوار حسین ہے جو ٹک ٹاک پر ویڈیوز اپ لوڈ کرتا تھا اور ان ویڈیوز پر نازیبا گانے لگا کر لڑکیوں کو ہراساں اور بلیک میل کرتا تھا۔پولیس حکام کا کہنا ہے کہ ملزم کی گرفتاری سائبر کرائم کینٹ ڈویژن کے سب انسپکٹر محمد اعظم اور ان کی ٹیم کی محنت کے نتیجے میں عمل میں آئی۔ ملزم کو جدید ٹیکنالوجی اور ہیومن انٹیلی جنس کے ذریعے پکڑا گیا۔ پولیس نے ملزم کے خلاف مقدمہ درج کرکے تفتیش شروع کر دی ہے۔ڈی آئی جی انویسٹیگیشن، ذیشان اصغر نے کہا کہ "خواتین کے ساتھ ہراسگی اور استحصال کرنے والے افراد کے ساتھ سختی سے نمٹا جائے گا۔ ملزم کو جلد کیفر کردار تک پہنچایا جائے گا اور تفتیش کے تمام قانونی تقاضوں کو پورا کیا جائے گا۔”
پولیس حکام نے مزید بتایا کہ ملزم کو گرفتار کرنے والی ٹیم کے لیے ایس ایس پی انویسٹیگیشن نے تعریفی اسناد دینے کا اعلان کیا ہے۔ پولیس کا کہنا ہے کہ اس کارروائی سے دیگر مجرموں کو بھی واضح پیغام ملے گا کہ خواتین کے حقوق کی پامالی برداشت نہیں کی جائے گی۔یہ کارروائی لاہور پولیس کی خواتین کی حفاظت اور سائبر کرائمز کے خلاف جاری جنگ کا حصہ ہے، جس میں ایسی سرگرمیوں میں ملوث افراد کے خلاف سخت قانونی کارروائیاں کی جا رہی ہیں۔
