اسلام آباد: چیئرمین پی ٹی آئی عمران خان کی بہن علیمہ خان کا کہنا ہے کہ تحریکِ انصاف کے وکیل لطیف کھوسہ درست کہہ رہے ہیں جبکہ وکیل علی ظفر بھی سچے ہیں۔
باغی ٹی وی : عمران خان کی بہن علیمہ خان سے اسلام آباد ہائی کورٹ کے باہر میڈیا سے گفتگو میں ایک صحافی نے سوال کیا کہ لطیف کھوسہ اور علی ظفر میں صحیح کون کہہ رہا ہے؟جس پر علیمہ خان کا کہنا تھا کہ لطیف کھوسہ درست کہہ رہے ہیں، علی ظفر بھی سچے ہیں، علی ظفر بھی یہی کہہ رہے ہیں آپ نے درست نہیں سنا، لطیف کھوسہ اور علی ظفر دونوں درست ہیں۔
واضح رہے کہ گزشتہ روز تحریک انصاف کے وکیل علی ظفر نے کہا تھا کہ چیئرمین پی ٹی آئی انٹرا پارٹی الیکشن نہیں لڑ رہے، ہفتے کو پی ٹی آئی کے انٹرا پارٹی الیکشن کرانے جا رہے ہیں، الیکشن کمیشن کو موقع دینا نہیں چاہتے کہ وہ بلے کا نشان چھِین لےعام انتخابات کے لیے تحریک انصاف کا عبوری سیٹ اپ آ رہا ہے، یہ کوئی مائنس ون فارمولہ نہیں ہے، چیئرمین پی ٹی آئی کے بغیر تحریک انصاف کا کوئی تصور نہیں۔
بشریٰ بی بی اور میرے درمیان گفتگو ذاتی تھی جو لیک کی گئی،لطیف کھوسہ
قبل ازیں میڈیا سے گفتگو کرتے ہوئے لطیف کھوسہ نے کہا تھا کہ چیئرمین پی ٹی آئی نے مائنس ون کی خبروں کی تردید کی ہے، پی ٹی آئی کے چیئرمین جو ہیں وہی رہیں گے اور انٹرا پارٹی الیکشن میں پی ٹی آئی کے موجودہ چیئرمین امیدوار ہوں گے، جو چیئرمین پی ٹی آئی نے کہا تھا وہ میں نے آ کر بتایا، ایک سوال کے جواب میں لطیف کھوسہ کا کہنا تھا کہ علی ظفر درست کہہ رہے یا نہیں لیکن میں ٹھیک کہہ رہا ہوں۔
دوسری جانب چیئرمین پی ٹی آئی عمران خان کی اہلیہ بشریٰ بی بی اور سینئر وکیل سردار لطیف کھوسہ کی مبینہ آڈیو سامنے آئی ہے جس میں دونوں عمران خان کی بہنوں عظمیٰ اور علیمہ خان سے اپنے اختلافات کا کھل کر اظہار کر رہے ہیں۔
