لاہور(باغی ٹی وی)طالبہ کی جعلی امی، 6 روزہ جسمانی ریمانڈ پر پولیس کے حوالے
لاہور کی انسداد دہشتگردی عدالت نے جعلی خبر پھیلانے والی ملزمہ سارہ خان کا 6 روزہ جسمانی ریمانڈ منظور کر لیا۔ ملزمہ پر کالج کی ایک طالبہ سے مبینہ زیادتی کی جھوٹی خبر سوشل میڈیا پر پھیلانے اور خود کو متاثرہ طالبہ کی والدہ ظاہر کرنے کا الزام ہے۔
پولیس نے سارہ خان کو 22 اکتوبر کو کراچی سے حراست میں لے کر لاہور منتقل کیا تھا اور اسی دن تھانہ گلبرگ میں پیکا ایکٹ اور دیگر دفعات کے تحت مقدمہ درج کیا گیا۔ ملزمہ نے سوشل میڈیا پر متاثرہ طالبہ کی والدہ ہونے کا دعویٰ کرتے ہوئے طالبہ سے مبینہ زیادتی کی جھوٹی خبر پھیلائی تھی جس سے عوام میں اشتعال پھیل گیا تھا۔
پراسیکیوشن کی درخواست پر انسداد دہشتگردی عدالت کے جج منظر علی گل نے جسمانی ریمانڈ منظور کرتے ہوئے پولیس کو مزید تفتیش کے لیے ملزمہ کو 6 روزہ ریمانڈ پر حوالے کر دیا۔
واضح رہے کہ 14 اکتوبر کو لاہور کے نجی کالج کی طالبہ سے مبینہ زیادتی کی خبر سوشل میڈیا پر وائرل ہوگئی تھی جس کے بعد طلبہ اور عوام میں شدید ردعمل سامنے آیا۔ احتجاج کے دوران پولیس اور طلبہ کے درمیان جھڑپیں ہوئیں، جس میں 27 طلبہ زخمی ہوگئے تھے۔
