کراچی: لیاری میں عمارت کی چھت گرنے سے 2 خواتین جاں بحق ہوگئیں جبکہ 3 افراد زخمی ہو گئے-
پولیس کے مطابق واقعہ لیاری کے علاقے کھڈا مارکیٹ میں پیش آیا جہاں عمارت کے چھٹے فلور کی چھت نیچے آگری،واقعے کی اطلاع ملتے ہی امدادی کارروائیاں شروع کردی گئیں اور زخمیوں کو اسپتال منتقل کردیا گیا ہے۔
ڈی آئی جی ساؤتھ نے بتایا کہ پولیس نے جائے حادثہ پر امدادی سرگرمیوں کا آغاز کیا جہاں سے 2 خواتین کی لاشوں سمیت 3 زخمیوں کو سول اسپتال منتقل کیا گیا جاں بحق ہونے والی دونوں خواتین بہنیں ہیں اور واقعے میں زخمی ہونے والی ان خواتین کی بیٹیاں ہیں۔
دوسری جانب اسپتال حکام نے بھی ٹراما سینٹر میں 2 لاشیں اور 3 زخمیوں کو لانے کی تصدیق کی ہے۔
علاقے کے مکینوں نے متعلقہ حکام سے مطالبہ کیا ہے کہ شہر میں خطرناک عمارتوں کا سروے کیا جائے تاکہ مستقبل میں ایسے افسوسناک حادثات سے بچا جا سکے وزیر بلدیات سعید غنی نے واقعے کا فوری نوٹس لیتے ہوئے ڈپٹی کمشنر ساؤتھ اور متعلقہ اداروں کو موقع پر پہنچ کر ریسکیو آپریشن تیز کرنے کی ہدایت جاری کر دی،سعید غنی نے ڈی جی ایس بی سی اے (سندھ بلڈنگ کنٹرول اتھارٹی) اور ڈپٹی کمشنر ساؤتھ سے واقعے کی تفصیلی رپورٹ طلب کر لی۔
