لنڈی کوتل(باغی ٹی وی رپورٹ) لنڈی کوتل فٹ سال کلب انڈر 17 نے اسلام آباد میں منعقدہ دوسری نیشنل سٹوڈنٹس گیمز 2025 میں شاندار کامیابی حاصل کرتے ہوئے چمپئن شپ اپنے نام کی۔ اس تاریخی فتح میں لنڈی کوتل کے کھلاڑیوں نے اسلام آباد سٹی ہاکس کو شکست دی، جو تین سال تک مسلسل چمپئن رہ چکے تھے۔
ضلع خیبر سے محمد ارشد کی قیادت میں تیس کھلاڑیوں پر مشتمل دستہ نے اس مقابلے میں شرکت کی، جبکہ حیات نذیر شینواری، محمد یاسین، فیض محمد، اور امان نے ٹیم آفیشلز کے طور پر حصہ لیا۔
اس کامیابی کے حوالے سے یاسین خان اور فیض محمد نے میڈیا سے گفتگو کرتے ہوئے کہا کہ لنڈی کوتل کے کھلاڑیوں نے نیشنل گیمز میں اپنے وطن کا نام روشن کیا ہے اور قوم کا سر فخر سے بلند کیا ہے۔ انہوں نے کہا کہ یہ کھلاڑی پہلے بھی قومی اور بین الاقوامی سطح پر اپنی صلاحیتوں کا لوہا منوا چکے ہیں اور آئندہ بھی میدان میں سرخرو ہوں گے۔
آخر میں انہوں نے عوامی نمائندگان اور حکام سے اپیل کی کہ لنڈی کوتل کے کھلاڑیوں کی حوصلہ افزائی کی جائے تاکہ وہ مزید کامیابیاں حاصل کر سکیں۔ اس موقع پر ڈی جی پاکستان سپورٹس بورڈ پیرزادہ، سینئر وائس پریزیڈنٹ پاکستان سٹوڈنٹس اولمپک ایسوسی ایشن قمر رانجھا اور دیگر حکام بھی موجود تھے۔
لنڈی کوتل کے کھلاڑیوں نے اس کامیابی کو خیبر سپورٹس کلب کے صدر معراج الدین شینواری اور جنرل سیکرٹری کلیم اللہ شینواری کی حمایت کے ساتھ ساتھ ڈسٹرکٹ خیبر پریس کلب لنڈی کوتل کے صدر شاہ رحمان شینواری اور پریس کلب ممبرز کا شکریہ بھی ادا کیا۔
