یورپی ملک مالٹا کے وزیرِ اعظم رابرٹ ابیلا نے اعلان کیا ہے کہ ان کا ملک آئندہ ماہ فلسطینی ریاست کو باقاعدہ طور پر تسلیم کر لے گا۔
غیر ملکی خبر رساں ایجنسی کے مطابق وزیرِ اعظم رابرٹ ابیلا کا کہنا تھا کہ غزہ میں جاری انسانیت سوز المیے پر آنکھیں بند نہیں کر سکتے، فلسطین کو ریاست تسلیم کرنا ہماری اخلاقی ذمے داری ہے۔”وزیرِ اعظم ابیلا کے مطابق یہ اقدام 20 جون کو اقوامِ متحدہ میں ہونے والی کانفرنس کے بعد کیا جائے گا۔دوسری جانب فلسطینی حکام کا کہنا ہے کہ اسرائیل نے اب تک غزہ کے 77 فیصد علاقے پر عملی کنٹرول حاصل کر لیا ہے، جس کے لیے اسے جارحانہ بمباری، جبری انخلاء اور فوجی دراندازی جیسے اقدامات پر انحصار کرنا پڑا۔
جمعے کی صبح سے جاری حملوں میں کم از کم 22 فلسطینی شہید ہو چکے ہیں، جن میں معروف صحافی حسن مجدی ابو وردہ اور ان کے اہلِ خانہ بھی شامل ہیں۔غزہ کی وزارتِ صحت کے مطابق اب تک اور 53,939 فلسطینی شہید 1,22,797 زخمی ہو چکے ہیں۔گورنمنٹ میڈیا آفس کے مطابق شہداء کی اپ ڈیٹ شدہ تعداد 61,700 سے زائد ہے، جن میں ہزاروں وہ افراد شامل ہیں جو تاحال ملبے تلے دبے ہیں اور مردہ تصور کیے جا رہے ہیں۔
اسرائیلی حکام کے مطابق 100 امدادی ٹرک بدھ سے اب تک غزہ میں داخل ہونے کی اجازت دی گئی ہے، مگر انسانی حقوق کے ادارے اس امداد کو ناکافی قرار دے رہے ہیں۔متاثرہ علاقے میں 2 ملین افراد قحط، ادویات کی شدید قلت اور صاف پانی کی عدم دستیابی جیسے حالات کا سامنا کر رہے ہیں۔
فلسطینی حکام نے اقوامِ متحدہ اور عالمی برادری سے مطالبہ کیا ہے کہ وہ اسرائیل کی جانب سے بین الاقوامی قوانین اور انسانی اقدار کی مسلسل خلاف ورزیوں کو روکنے کے لیے فوری اور مؤثر اقدامات کریں۔
غزہ میں اسرائیلی جارحیت جاری، مزید 40 شہادتیں
