پاکستان کی عالمی شہرت یافتہ سماجی کارکن اور تعلیم کی علمبردار، نوبل انعام یافتہ ملالہ یوسف زئی آج 28 سال کی عمر میں قدم رکھ چکی ہیں۔ ملالہ نے اپنی زندگی تعلیم، امن اور خواتین کے حقوق کی علمبرداری کے لیے وقف کی ہے اور دنیا بھر میں پاکستان کا نام روشن کیا ہے۔
ملالہ یوسف زئی 12 جولائی 1997 کو سوات کے شہر مینگورہ میں پیدا ہوئیں۔ بچپن سے ہی تعلیم کے لیے ان کا جذبہ بے مثال تھا اور انہوں نے سکول کی سطح پر ہی لڑکیوں کی تعلیم کے حق میں آواز بلند کرنی شروع کی۔ تاہم، ان کی یہ آواز دہشت گردوں کو ناگوار گزری اور 9 اکتوبر 2012 کو وہ سکول سے گھر جاتے ہوئے شدت پسندوں کی فائرنگ کا نشانہ بن گئیں، جس کے نتیجے میں وہ شدید زخمی ہو گئیں۔کئی دنوں تک زندگی اور موت کی کشمکش میں رہنے کے بعد ملالہ نے ہمت نہیں ہاری اور نہ صرف اپنی صحت کو بحال کیا بلکہ دنیا بھر میں تعلیم اور خواتین کے حقوق کے لیے ایک عالمی علامت بن گئیں۔ ان کی جرأت اور حوصلہ نے نہ صرف پاکستان بلکہ پوری دنیا کو متاثر کیا۔
2014 میں ملالہ یوسف زئی کو نوبل امن انعام سے نوازا گیا، جو انہیں دنیا کی سب سے کم عمر نوبل انعام یافتہ شخصیت بناتا ہے۔ اس کے علاوہ ملالہ کو سخاروف انعام، ورلڈ چلڈرن پرائز سمیت 40 سے زائد بین الاقوامی اعزازات سے نوازا جا چکا ہے۔ملالہ نے تعلیم کے فروغ کے لیے "ملالہ فنڈ” بھی قائم کیا ہے، جو دنیا بھر میں تعلیم کے حق کے لیے کام کر رہا ہے۔ آج وہ برطانیہ کے شہر لندن میں مقیم ہیں، جہاں سے اپنے مشن کو جاری رکھے ہوئے ہیں۔
ملالہ یوسف زئی کا کہنا ہے کہ حقیقی تبدیلی صرف تعلیم کے ذریعے ممکن ہے اور وہ ہمیشہ اس عزم کے ساتھ تعلیم کے فروغ اور محروم بچوں کے حقوق کی جنگ لڑتی رہیں گی۔
پاکستانی قوم ملالہ کی سالگرہ پر انہیں دل کی گہرائیوں سے مبارکباد پیش کرتی ہے اور ان کی کامیابیوں پر فخر محسوس کرتی ہے۔
