اندور: مارک شیٹ نہ دینے پر سابقہ طالبعلم نے پیٹرول چھڑک کر کالج کی پرنسپل کو آگ لگا دی۔
باغی ٹی وی: بھارتی میڈیا رپورٹس کے مطابق یہ افسوسناک واقعہ بھارتی ریاست مدھیہ پردیش کے شہر اندور میں پیش آیا جہاں فارمیسی کالج کے سابقہ طالبعلم آشوتوش شریواستو نے مارک شیٹ دینے میں تاخیر پر پیر کو کالج کی پرنسپل کو اس وقت آگ لگائی جب وہ گھر لوٹ رہی تھیں۔
پولیس حکام کے مطابق آگ لگتے ہی پرنسپل کالج کی عمارت کی طرف بھاگیں جس کے بعد عملے نے آگ بجھائی اور انہیں اسپتال پہنچایا۔
انسٹی ٹیوٹ کی انتظامیہ سمرول علاقے میں بی ایم کالج آف فارمیسی نے کہا کہ شریواستو "مجرمانہ رجحانات” رکھتے ہیں۔ ان کا کہنا تھا کہ وہ پرنسپل پر مارک شیٹ کے تنازعہ میں انسٹی ٹیوٹ کے پروفیسر پر چاقو سے حملے کے چار ماہ پرانے کیس کو واپس لینے کے لیے غیر ضروری دباؤ ڈال رہے تھے۔
اندور کے پولیس سپرنٹنڈنٹ کے مطابق کالج کی پرنسپل 54 سالہ ویمکتا شرما کا 90 فیصد جسم جھلس چکا ہے اور ان کی حالت تشویش ناک ہے جبکہ ملزم کے ہاتھ اور سینے پر بھی زخم آئے جائے وقوعہ پر موجود کالج کے چوکیدار نے ملزم کو پکڑا اور پولیس کے حوالے کردیا-
انہوں نے کہا کہ شریواستو پر تعزیرات ہند (آئی پی سی) کی دفعہ 307 (قتل کی کوشش) کے تحت مقدمہ درج کیا گیا ہے۔
پولیس کے مطابق پوچھ گچھ کے دوران ملزم نے انکشاف کیا کہ اس نے اپنے ساتویں اور آٹھویں سمیسٹر کے امتحانات دیئے تھے اور نتیجہ جولائی 2022 میں آیا تھاتاہم کئی بار درخواست کرنے کے بعد بھی کالج اسے مارک شیٹ فراہم نہیں کر رہا تھاجس کی وجہ سےاسے پرنسپل پر کافی غصہ تھا تاہم کالج نے ملز م کا مذکورہ الزام مسترد کر دیا ہے-
