وزیراعلیٰ مریم نواز شریف نے پنجاب کے بے گھر صنعتی ورکرز کے نئے تعمیر کردہ 720 فلیٹس کی قرعہ اندازی کر دی۔ وزیراعلیٰ مریم نواز شریف نے بٹن دبا کر قرعہ اندای کے پراسیس کا آغاز کیا اور قرعہ اندازی میں کامیاب صنعتی ورکرز کو خود فون کرکے مبارکباددی۔
وزیراعلیٰ مریم نواز شریف نے کہا کہ ماں جیسی ریاست نے 720 محنت کش خاندانوں کو انکے اپنے گھروں میں بسانے کا بندوبست کر دیا۔ پنجاب کے محنت کش خاندانوں کو ماہانہ کرائے اوربے دخلی کی اذیت سے نکال دیا ہے۔ وزیراعلیٰ مریم نواز شریف کے حکم پر 720 صنعتی ورکرز بنے بنائے گھروں کے مالک ہوں گے۔ وزیراعلیٰ مریم نواز شریف نے بیوگان اور سپیشل افراد کو قرعہ اندازی سے الگ کر کے اپلائی کرنے والوں کو فلیٹ دینے کا حکم دے دیا۔ وزیراعلیٰ مریم نواز شریف نے سپیشل صنعتی ورکرز کی آسانی اور تحفظ کے لئے انہیں گراؤنڈ فلور پر فلیٹس دینے کی ہدایت کی۔وزیراعلیٰ مریم نواز شریف نے قرعہ اندازی میں کامیاب لوگوں کو سات دن کے اندر اندر فلیٹ دینے کا حکم بھی دیا۔ وزیراعلیٰ مریم نواز شریف نے صنعتی ورکرز کے لیے مزید 1872 فلیٹس آئندہ 18 ماہ میں مکمل کرنے کا حکم دیا۔ وزیراعلیٰ مریم نوا زشریف نے شیخوپورہ میں قائدا عظم بزنس پارک میں 700ورکرز کے لئے بیچلر ہاسٹل کی تین ماہ میں تکمیل کی ہدایت کی۔
وزیراعلیٰ مریم نواز شریف نے ندیم طاہر نامی صنعتی ورکرکو خود فون کیا اور انہیں مبارکباد دی اور گفتگو کرتے ہوئے کہا کہ اپنی امی ابو کو ساتھ رکھنا، ان کی دعاؤں سے آپ کو فلیٹ ملا۔ صوبائی وزیر محنت منشاء اللہ بٹ نے صنعتی ورکرز کے فلیٹس پراجیکٹ کے بارے میں تفصیلی بریفنگ دی۔ صوبائی وزیر محنت منشاء اللہ بٹ نے کہا کہ صنعتی ورکرز کے لئے مفت فلیٹ، پلاٹ اور بیچلر ہاسٹل محمد نواز شریف کا ویژن ہے۔ بریفنگ میں بتایا گیا کہ ورکر ویلفیئر کمپلیکس،سندر انڈسٹریل اسٹیٹ فیز ون کے لئے 5897 ورکرز اہل قرار پائے۔ قرعہ اندازی میں کامیاب قصور کے صنعتی ورکرزکو480 جبکہ 240 فلیٹس لاہور کے ورکرز کے لئے مخصوص کئے گئے ہیں۔ بریفنگ میں مزید بتایا گیا کہ سندر انڈسٹریل اسٹیٹ کے فلیٹ پراجیکٹ کی مجموعی لاگت تین ارب 40 کروڑ روپے ہے۔ صنعتی ورکرز کے لئے بنائے گئے ہر شاندار فلیٹ کی لاگت 36 لاکھ روپے سے زائد ہے۔ سندر فیز ٹو کے لئے 672 فلیٹس، ملتان میں 656 اور وار برٹن ننکانہ صاحب میں 544 فلیٹس صنعتی ورکرز کو دیئے جائیں گے۔ بریفنگ میں بتایا گیا کہ جھنگ میں کمالیہ میں بننے والی لیبر کالونیز میں 2000 صنعتی کارکنوں کو تین تین مرلے کے مفت پلاٹ دیئے جائیں گے۔ جھنگ میں 1300اور کمالیہ میں 700صنعتی ورکرز کو انفراسٹرکچر ڈویلپمنٹ کے بعد پلاٹ ملیں گے۔
