اوکاڑہ (باغی ٹی وی،نامہ نگار ملک ظفر)اوکاڑہ بائی پاس کے قریب اذان گارڈن، نزد 52 ٹو ایل کے مقام پر ایک تیز رفتار مزدا ٹرک نمبری LES-3426 نے آگے جانے والے ٹریلر Z-1237 کو پیچھے سے ٹکر مار دی، جس کے نتیجے میں مزدا میں سوار دو افراد شدید زخمی ہو گئے۔
ریسکیو ذرائع کے مطابق حادثے میں 25 سالہ راشد ولد منظور سکنہ وہاڑی اور 26 سالہ بلال ولد بشیر سکنہ پتوکی کو شدید چوٹیں آئیں۔ اطلاع ملتے ہی ریسکیو 1122 کی ٹیمیں موقع پر پہنچ گئیں اور زخمیوں کو ابتدائی طبی امداد دینے کے بعد فوری طور پر ڈسٹرکٹ ہیڈکوارٹر ہسپتال منتقل کیا گیا، جہاں راشد کی حالت تشویشناک بتائی جا رہی ہے۔
حادثے کی وجہ تاحال تیز رفتاری یا ممکنہ بریک فیل ہونا قرار دی جا رہی ہے، تاہم پولیس نے بھی موقع پر پہنچ کر شواہد اکٹھے کرنا شروع کر دیے ہیں۔ واقعہ کے بعد ٹریفک کی روانی کچھ دیر کے لیے متاثر ہوئی، جسے بعد ازاں بحال کر دیا گیا۔
