منڈی بہاؤالدین (باغی ٹی وی، نامہ نگار افنان طالب) تھانہ میانہ گوندل اور پاہڑیانوالی میں دو الگ الگ مبینہ پولیس مقابلوں کے دوران درجنوں سنگین مقدمات میں مطلوب ایک خطرناک ملزم ہلاک جبکہ دوسرا زخمی حالت میں گرفتار کر لیا گیا۔
پاہڑیانوالی ناکہ پر ملزمان نے پولیس پارٹی پر فائرنگ کر دی، جس کے جواب میں ہونے والے مبینہ پولیس مقابلے میں اورنگزیب عرف رنگو ہلاک ہو گیا۔ رنگو 28 سنگین مقدمات میں پولیس کو مطلوب تھا۔
دوسری کارروائی پنڈی راواں میں ہوئی جہاں ملزمان نے مبینہ طور پر پولیس پر سیدھی فائرنگ کی۔ پولیس کی جوابی کارروائی میں خضر حیات کو زخمی حالت میں گرفتار کر لیا گیا۔ خضر حیات 19 سنگین مقدمات میں ریکارڈ یافتہ نکلا۔
پولیس کے مطابق واقعات میں فرار ہونے والے دیگر ملزمان کی تلاش جاری ہے، جبکہ علاقے میں سیکیورٹی مزید سخت کر دی گئی ہے۔
