منڈی بہاوالدین میں یوم آزادی ملی جوش و جذبے سے منایاگیا

منڈی بہاوالدین،باغی ٹی وی (نامہ نگار افنان طالب)منڈی بہاوالدین میں یوم آزادی ملی جوش و جذبے سے منایاگیا

ضلع انتظامیہ کی جانب سے 74ویں یوم آزادی کی مرکزی تقریب مقامی میرج ہال میں منعقد ہوئی۔ اس موقع پر مہمان خصوصی طور پر قومی اسمبلی کے ممبر ناصر اقبال بوسال، ڈپٹی کمشنر شاہد عمران مارتھ، صوبائی اسمبلی کے ممبر خالد محمود رانجھا، ڈی پی او احمد محی الدین اور دیگر اعلیٰ حکام نے شرکت کی۔

تقریب میں طلباء و طالبات نے وطن سے محبت کے جذبات کا اظہار کرتے ہوئے تقریریں، ٹیبلوز اور ملی نغمے پیش کیے۔ جس پر حاضرین نے بھرپور داد دی۔ ضلع سے تعلق رکھنے والے سی ایس ایس آفیسرز کو بھی خراج تحسین پیش کیا گیا۔

اس موقع پر قومی اسمبلی کے ممبر ناصر اقبال بوسال نے کہا کہ آزادی کی قدر محکوم قوموں سے بہتر کوئی نہیں جانتا۔ پاکستان کی آزادی کے لیے بے شمار قربانیاں دی گئی ہیں۔ ہمیں اس ملک کی حفاظت کے لیے اپنی جانوں قربان کرنے کا عہد کرنا چاہیے۔

ڈپٹی کمشنر شاہد عمران مارتھ نے کہا کہ آزادی ایک عظیم نعمت ہے اور ہمیں اس کی قدر کرنی چاہیے۔ انہوں نے عوام سے اپیل کی کہ وہ ملک کی ترقی میں اپنا کردار ادا کریں۔

صوبائی اسمبلی کے ممبر خالد محمود رانجھا، ڈی پی او احمد محی الدین اور مسلم لیگ (ن) کے صدر مشاہد رضا نے بھی خطاب کرتے ہوئے ملک کی خدمت کا عہد کیا۔

تقریب کے اختتام پر طلباء کی پرفارمنس کے لیے انعامات کا اعلان کیا گیا۔

اس تاریخی دن کے موقع پر ضلع بھر میں جشن کا سماں رہا اور لوگوں نے مل کر آزادی کی خوشی منائی۔