منڈی بہاؤالدین (نامہ نگارافنان طالب)منڈی بہاؤالدین کی تحصیل پھالیہ میں واقع گاؤں پاہڑیانوالی میں اینٹوں کے ایک بھٹے پر پیش آنے والے افسوسناک حادثے میں 13 سالہ بچہ جان کی بازی ہار گیا۔ یہ واقعہ چائلڈ لیبر کے خطرات کو ایک بار پھر سامنے لے آیا ہے۔
تفصیلات کے مطابق 13 سالہ محمد ریحان اینٹوں کی تیاری کے لیے مٹی کو مشین میں ڈال رہا تھا کہ اچانک مشین رک گئی۔ ڈرائیور کی ہدایت پر ریحان مشین کے اندر رکاوٹ دیکھنے کے لیے گیا، مگر اسی دوران ڈرائیور نے بغیر اطلاع کے مشین دوبارہ چلا دی۔ مشین میں آنے سے ریحان شدید زخمی ہوا اور موقع پر ہی دم توڑ گیا۔ پولیس تھانہ پاہڑیانوالی نے ضروری کارروائی کے بعد لاش کو ورثاء کے حوالے کر دیا۔
مقتول کے والد مقصود احمد کی مدعیت میں مقدمہ درج کر لیا گیا ہے اور پولیس نے تحقیقات کا آغاز کر دیا ہے۔ اس اندوہناک حادثے نے پورے علاقے میں سوگ کی فضا قائم کر دی ہے۔
اس واقعے پر مقامی شہریوں نے شدید غم و غصے کا اظہار کیا ہے۔ ان کا کہنا ہے کہ بھٹوں اور فیکٹریوں میں حفاظتی اقدامات انتہائی غیر تسلی بخش ہیں اور انتظامیہ کی جانب سے چائلڈ لیبر کی روک تھام کے لیے کوئی خاطر خواہ اقدامات نہیں کیے جاتے۔ شہریوں نے مطالبہ کیا ہے کہ انتظامیہ اس نوعیت کے حادثات کی روک تھام کے لیے فوری اور مؤثر اقدامات یقینی بنائے تاکہ آئندہ ایسے کسی سانحے سے بچا جا سکے۔
