میہڑ،باغی ٹی وی (نامہ نگار منظورعلی جوئیہ)واپڈا سیپکو ملازمین کی جبری برطرفیوں کے خلاف میہڑ میں احتجاجی ریلی نکالی گئی، جس کی قیادت واپڈا ہائیڈرو یونین کے سعید کلہوڑو، حسین بخش جتوئی، محمد علی شیخ اور دیگر رہنماؤں نے کی۔ سیکڑوں ملازمین نے واپڈا آفس سے ہاتھوں میں پلے کارڈز اٹھا کر میہڑ پریس کلب تک ریلی نکالی اور زوردار نعرے لگائے۔
مظاہرین نے میڈیا سے گفتگو کرتے ہوئے کہا کہ سیپکو کے ملازمین اور افسران دن رات صارفین کی خدمت میں مصروف رہتے ہیں اور اپنی ذمہ داریوں کو احسن طریقے سے ادا کرتے ہیں، لہٰذا ان کی جبری برطرفیاں سراسر ناانصافی ہیں۔ انہوں نے کہا کہ ہم کسی صورت میں اس ناانصافی کو برداشت نہیں کریں گے۔
مظاہرین نے مزید کہا کہ ہم ہائیڈرو لیبر ورکر یونین کے قائد عبدالطیف نظامانی اور ریجنل چیئرمین نثار احمد شیخ کے ہر حکم پر عمل کرتے ہوئے احتجاج کر رہے ہیں۔ انہوں نے مطالبہ کیا کہ سیپکو ملازمین کی جبری برطرفیاں فوری طور پر ختم کی جائیں اور ان کی بے چینی دور کی جائے۔
