میرپورخاص (باغی ٹی وی نامہ نگار سید شاہزیب شاہ) میر شیر محمد خان تالپور پبلک اسکول میرپورخاص میں چیئرمین بورڈ آف گورنرز و ڈویژنل کمشنر فیصل احمد عقیلی اور چیئرمین ضلع کونسل میر انور تالپور کی صدارت میں بورڈ آف گورنرز کا اجلاس ہوا جس میں اسکول کی بہتری اور تعلیمی معیار کو بڑھانے کے لیے 10 نکاتی ایجنڈے پر غور کیا گیا۔
اجلاس میں پرنسپل کی مدت ملازمت میں توسیع، سینیئر اساتذہ کی تنخواہوں میں اضافہ، ہفتہ وار ڈاکٹر معائنہ، پی پی ایچ آئی کی ڈسپنسری کا قیام، سولر سسٹم اور واٹر پلانٹ نصب کرنے کی منظوری دی گئی۔ حکومت سندھ کی جانب سے مالی سال میں بڑھائی گئی گرانٹ اور نئے تعمیری اسکیموں کی منظوری بھی دی گئی۔ اسکول کے تعلیمی معیار کو بہتر بنانے کے لیے پانچ کمیٹیاں تشکیل دی گئیں۔
اجلاس میں ایم این اے پیر افتاب حسین شاہ جیلانی، ڈپٹی کمشنر ڈاکٹر رشید مسعود، دیگر حکام اور تعلیمی نمائندگان نے شرکت کی جبکہ ایڈیشنل سیکریٹری ایجوکیشن سندھ ڈاکٹر فوزیہ خان ویڈیو لنک کے ذریعے شریک ہوئیں۔
