میرپور خاص (باغی ٹی وی، نامہ نگار سید شاہزیب شاہ)ایس ایس پی میرپور خاص شبیر احمد سیٹھار کے سخت احکامات کے تحت پولیس نے منشیات فروشوں، شراب فروشوں اور جرائم پیشہ افراد کے خلاف کارروائیاں تیز کر دی ہیں۔
ایس ایچ او سیٹلائٹ ٹاؤن انسپکٹر غازی خان راجڑ کی قیادت میں پولیس نے خفیہ اطلاع پر گلشن کالونی میں شراب فروشوں کے گودام پر چھاپہ مارا۔ اس دوران فیصل خان عرف میر زمان کو گرفتار کیا گیا، جبکہ شیر زمان پٹھان فرار ہونے میں کامیاب ہو گیا۔ پولیس نے گودام سے مختلف اقسام کی شراب کی بڑی تعداد برآمد کی، جن میں واٹ ون (48 بوتلیں)، ڈرائجن پوی (30 بوتلیں)، کلب ڈرائجن پوی (96 پوائنٹس) اور وسکی (48 بوتلیں) شامل ہیں۔ گرفتار اور فرار ملزمان کے خلاف مقدمہ درج کر لیا گیا ہے اور مزید تفتیش جاری ہے۔
ایس ایچ او غریب آباد انسپکٹر فیصل شفیع میمن کی قیادت میں پولیس نے سیال کالونی سے چند دن قبل چوری ہونے والی موٹر سائیکل برآمد کی۔ پولیس نے دو ملزمان نظیر پنھور اور رائے چند بھیل کو گرفتار کر لیا۔ دونوں ملزمان کے خلاف مقدمہ درج کر لیا گیا ہے اور مزید تفتیش جاری ہے۔
ایس ایس پی میرپور خاص نے پولیس کی کارکردگی پر اطمینان کا اظہار کرتے ہوئے مزید کارروائیاں جاری رکھنے کی ہدایت دی ہے۔
