میرپورخاص (باغی ٹی وی، سید شاہزیب شاہ) ایس ایس پی میرپورخاص شبیر احمد سیٹھار کے سخت احکامات پر میرپورخاص پولیس کی منشیات فروشوں اور جرائم پیشہ عناصر کے خلاف کارروائیاں جاری ہیں۔ مختلف تھانوں کی حدود میں کی گئی کارروائیوں کے دوران 6 ملزمان کو گرفتار کرکے اسلحہ، منشیات اور دیگر سامان برآمد کیا گیا ہے۔
تھانہ ٹاؤن کی حدود میں ایس ایچ او سب انسپکٹر کامران ہالیپوٹو نے دوران گشت ٹنڈو آدم روڈ پر 4 مشکوک افراد کو روکا۔ ملزمان نے پولیس پر فائرنگ کی، جس کے بعد ایک ملزم امانت اللہ ولد اکبر نوہڑی کو گرفتار کرلیا گیا، جبکہ تین فرار ہونے میں کامیاب ہوگئے۔ گرفتار ملزم سے چوری شدہ موٹر سائیکل، 30 بور پستول اور دیگر اشیاء برآمد ہوئیں۔ ملزم کے خلاف مختلف دفعات کے تحت مقدمات درج کیے گئے ہیں، جبکہ فرار ملزمان کی گرفتاری کے لیے چھاپے جاری ہیں۔
سیٹلائٹ ٹاؤن میں ایس ایچ او غازی خان راجڑ نے چونا فیکٹری کے قریب خفیہ اطلاع پر کارروائی کرتے ہوئے مستانو بھیل ولد چنیسر بھیل کو گرفتار کیا۔ ملزم کے قبضے سے 100 تیار مین پڑیاں اور 95 کلو گٹکے کا خام مال برآمد کیا گیا۔ مقدمہ درج کرکے مزید تفتیش جاری ہے۔
جھڈو تھانے کی حدود میں انسپکٹر شاہنواز خاصخیلی نے دو مختلف کارروائیوں میں شکیل احمد ولد لیاقت قائم خانی اور فدا محمد ولد یعقوب ٹنگری کو گرفتار کیا۔ کارروائی کے دوران ملزمان سے 230 گٹکا اور ایک 30 بور پستول برآمد کیا گیا۔ دونوں ملزمان کے خلاف الگ الگ مقدمات درج کیے گئے ہیں۔
ڈیگان پولیس اسٹیشن کے ایس ایچ او عابد زرداری نے سیم نالہ موری کے قریب کارروائی کرتے ہوئے نور محمد ولد غلام رسول کو گرفتار کرلیا۔ ملزم کے قبضے سے 60 ماوہ گٹکا برآمد ہوا۔ مقدمہ درج کرکے مزید تفتیش جاری ہے۔
تعلقہ پولیس اسٹیشن کے ایس ایچ او آفتاب رند نے سیم نالہ موری کے قریب ایک اور کامیاب کارروائی میں رضا محمد ولد عبد الستار مہر کو گرفتار کیا۔ ملزم کے قبضے سے 10 پیکٹ سفینہ (550 ساشے) برآمد کیے گئے۔ مقدمہ درج کرکے تحقیقات جاری ہیں۔
پولیس کی ان کارروائیوں کو عوامی و سماجی حلقوں نے سراہا ہے اور جرائم کے خاتمے کے لیے ایسے آپریشنز کی تسلسل سے جاری رہنے کی امید ظاہر کی ہے۔
