ڈاکٹرغلام مصطفی بڈانی
میرپورخاص(باغی ٹی وی نامہ نگار سید شاہزیب شاہ ) علماء و مشائخ کا لبیک یا اقصیٰ و دفاع پاکستان ریلی نکالنے کا اعلان
میرپورخاص کے علماء و مشائخ نے فلسطین میں اسرائیلی جارحیت اور بھارت کی جانب سے پاکستان کو دی جانے والی دھمکیوں کے خلاف لبیک یا اقصیٰ و دفاع پاکستان ریلی نکالنے کا اعلان کیا ہے۔ یہ اعلان مفتی شریف سعیدی کی قیادت میں کیا گیا ہے۔
تفصیلات کے مطابق، جامعہ نورالقرآن میں مفتی شریف سعیدی کی سربراہی میں اہلسنت اکابرین، علماء کرام اور مشائخ عظام کا ایک اہم اجلاس منعقد ہوا۔ اجلاس میں مفتی اعظم پاکستان مفتی منیب الرحمن کے جذبے کو خراج تحسین پیش کیا گیا اور 12 مئی بروز پیر سہ پہر 3:30 بجے اسٹیشن چوک سے گلستان بلدیہ تک نکالی جانے والی ریلی میں بھرپور شرکت کی اپیل کی گئی۔
مفتی شریف سعیدی نے اپنے ویڈیو بیان میں ریلی کے مقاصد بیان کرتے ہوئے کہا کہ یہ ریلی فلسطین میں اسرائیلی ظلم و بربریت کے خلاف اور بھارت کی جانب سے پاکستان کو دی جانے والی دھمکیوں کے جواب میں نکالی جا رہی ہے۔ انہوں نے واضح کیا کہ پاکستانی قوم اپنی مسلح افواج کے شانہ بشانہ کھڑی ہے اور کسی بھی بھارتی جارحیت کا منہ توڑ جواب دیا جائے گا۔
مفتی شریف سعیدی نے تمام درد مند حضرات، مدارس کے طلباء و اساتذہ، علماء کرام، مشائخ عظام، تاجر برادری، وکلاء اور زندگی کے دیگر شعبوں سے تعلق رکھنے والے افراد سے اپیل کی کہ وہ فلسطینی عوام اور پاک فوج سے اظہار یکجہتی کے لیے 12 مئی کو ہونے والی اس ریلی میں ضرور شرکت کریں۔ اس موقع پر معروف سوشل ورکر محمود صابری سمیت دیگر کئی علماء کرام بھی موجود تھے۔
