گلگت بلتستان کے ضلع دیامر میں تباہ کن سیلاب کے دوران لاپتہ ہونے والی نجی ٹی وی چینل کی اینکر پرسن شبانہ لیاقت کی گاڑی بابوسر کے مقام پر ملبے سے مل گئی، تاہم گاڑی میں کوئی فرد موجود نہیں تھا۔ متاثرہ فیملی سمیت دیگر لاپتہ افراد کی تلاش تاحال جاری ہے۔
ترجمان گلگت بلتستان حکومت فیض اللہ فراق کے مطابق، بابوسر ناران شاہراہ پر جاری سرچ آپریشن میں تیزی لائی گئی ہے۔ اب تک تقریباً 15 سیاح ریلے میں بہہ چکے ہیں، جن میں شبانہ لیاقت، ان کے شوہر لیاقت، اور چار بچے بھی شامل ہیں۔حکام کے مطابق، گاڑی کے ملبے سے ملنے کے بعد شبانہ لیاقت کا پرس بھی بابوسر تھک کے ایک مقامی رضاکار کو ملا ہے، جس میں ان کا شناختی کارڈ موجود تھا۔ یہ تفصیل لاپتہ فیملی کی شناخت کی تصدیق کرتی ہے۔
ترجمان نے بتایا کہ شاہراہ بابوسر کو ایک ہفتے بعد جزوی طور پر بحال کر کے یکطرفہ ٹریفک کے لیے کھول دیا گیا ہے، تاہم شہریوں سے غیر ضروری سفر سے گریز کرنے کی اپیل کی گئی ہے۔انہوں نے مزید کہا کہ ریسکیو آپریشن میں پولیس، ضلعی انتظامیہ، گلگت بلتستان ڈیزاسٹر منیجمنٹ اتھارٹی، ریسکیو ادارے، سراغ رساں کتے اور ڈرونز حصہ لے رہے ہیں تاکہ لاپتہ افراد کا سراغ لگایا جا سکے۔
یاد رہے کہ حالیہ طوفانی بارشوں کے نتیجے میں بابوسر تھک نالے میں سیلاب آنے سے 10 افراد جاں بحق اور کئی لاپتہ ہو گئے تھے، جس کے بعد سیاحتی مقام بابوسر میں ہر طرف تباہی کے مناظر دکھائی دے رہے ہیں۔
9 مئی کیس: اعجاز چوہدری، احمد بھچر اور احمد چٹھہ نااہل، نشستیں خالی
پنجاب اسمبلی ہنگامہ: ایوان سے احاطہ تک تصادم، دو اپوزیشن ارکان معطل
پنجاب اسمبلی میں ہاتھا پائی: اپوزیشن رکن کا حکومتی رکن کو تھپڑ
