پاکستان میں ریسکیو اور ریلیف آپریشنز کے لیے بڑا سنگ میل عبور کر لیا گیا ہے، حکومت پنجاب نے سیلاب متاثرین کو امداد پہنچانے اور محفوظ مقام تک منتقل کرنے کے لیے جدید ایئرلفٹ ڈرون حاصل کر لیا۔
یہ ملک کی پہلی ایمرجنسی ایئرلفٹ ڈرون سروس قرار دی جارہی ہے، جو دو سو کلوگرام تک وزنی شخص کو اٹھا کر محفوظ مقام تک منتقل کرنے کی صلاحیت رکھتی ہے۔سیکرٹری داخلہ پنجاب کے مطابق اس ٹیکنالوجی کی بدولت ناقابل رسائی اور خطرناک مقامات سے بھی متاثرہ افراد کو ریسکیو کیا جا سکے گا۔ سول ڈیفنس کے لیے مزید 10 ایئرلفٹ ڈرونز خریدنے کا فیصلہ بھی کیا گیا ہے۔حکام نے بتایا کہ ڈرون کی ٹیسٹ فلائیٹس لاہور میں کامیابی سے مکمل کر لی گئیں، جس کے بعد سیکرٹری داخلہ نے اسے جنوبی پنجاب کے لیے ملتان بھجوانے کی ہدایت جاری کی ہے۔
ان کا کہنا تھا کہ اس جدید ٹیکنالوجی کے استعمال سے ریسکیو آپریشنز میں انقلابی تبدیلی آئے گی اور متاثرین تک بروقت مدد پہنچانا ممکن ہوگا۔
جلالپور پیر والا:وزیر اعلیٰ مریم نواز کا دورہ، سیلاب متاثرین کے دکھ درد میں شریک
