مولانا فضل الرحمان کا مبارک ثانی کیس کے فیصلے کا خیرمقدم، یوم تشکر کا اعلان
![molana](https://baaghitv.com/wp-content/uploads/2024/07/molana.jpg)
جمعیت علماء اسلام (ف) کے سربراہ مولانا فضل الرحمان نے سپریم کورٹ کے مبارک ثانی کیس میں فیصلہ سنانے کے بعد کل ملک بھر میں یوم تشکر منانے کا اعلان کیا ہے۔ یہ اعلان انہوں نے اسلام آباد میں میڈیا سے گفتگو کرتے ہوئے کیا، جہاں انہوں نے اس تاریخی فیصلے پر دینی جماعتوں اور ان کے کارکنان کو مبارکباد پیش کی۔مولانا فضل الرحمان نے کہا کہ دنیا کی کوئی طاقت عقیدہ ختم نبوت کے خلاف سازش نہیں کرسکتی، اور سپریم کورٹ کا فیصلہ اس بات کا منہ بولتا ثبوت ہے۔ انہوں نے کہا کہ عدالت عظمیٰ نے اس کیس میں قابل اعتراض تمام شقوں کو ختم کر دیا ہے، جو کہ دینی جماعتوں کی محنت اور کوششوں کا نتیجہ ہے۔ ان کا کہنا تھا کہ دینی جماعتوں نے سپریم کورٹ کو فیصلے سے متعلق قائل کیا اور عدالت نے پچھلی سماعتوں کے دوران سامنے آنے والے اعتراضات کو ختم کر دیا۔
سربراہ جے یو آئی نے چیف جسٹس کی تعریف کرتے ہوئے کہا کہ انہوں نے بہت فراخدلی کا مظاہرہ کیا ہے اور جس مثبت رویے کا اظہار کیا ہے، وہ قابل ستائش ہے۔ مولانا فضل الرحمان نے کہا کہ ایک انسان اتنے بڑے منصب پر ہو کر یہ کہتا ہے کہ ہم سے غلطی ہوسکتی ہے، تو یہ ایک بڑی بات ہے اور اس پر انہیں داد دینی چاہیے۔مولانا فضل الرحمان نے اس مسئلے پر حکومت اور اپوزیشن کے درمیان اتفاق رائے کو بھی سراہا اور کہا کہ اس معاملے پر سب ایک صفحے پر تھے۔ انہوں نے کہا کہ ہم انکے انسانی حقوق کو تسلیم کرتے ہیں بشرطیکہ وہ آئین پاکستان کو تسلیم کریں۔ اگر کوئی شہری دنیا کے کسی حصے میں آئین کو تسلیم نہیں کرتا تو اس کے شہری حقوق ختم ہو جاتے ہیں۔سپریم کورٹ کے فیصلے کو دینی جماعتوں اور مذہبی طبقے کی بڑی کامیابی قرار دیتے ہوئے مولانا فضل الرحمان نے کہا کہ اس کیس میں عدالت نے وہی فیصلہ کیا جو دینی جماعتوں کی خواہش تھی۔ ان کے مطابق، اس فیصلے سے ملک میں ختم نبوت کے عقیدے کی مضبوطی مزید بڑھے گی اور آئندہ اس عقیدے کے خلاف کسی قسم کی سازش نہیں ہونے دی جائے گی۔مولانا فضل الرحمان کی اس تقریر اور اعلان کے بعد ملک بھر میں ان کے حامیوں نے یوم تشکر منانے کی تیاریاں شروع کر دی ہیں۔