اوچ شریف (باغی ٹی وی، نامہ نگار حبیب خان)شمس آباد ٹول پلازہ بہاولپور لنک روڈ کے قریب ایک افسوسناک حادثہ اس وقت پیش آیا جب تیز رفتار موٹرسائیکل کے سامنے اچانک ایک آوارہ کتا آ گیا، جس کے باعث موٹرسائیکل بے قابو ہو کر الٹ گئی۔ حادثے میں دو افراد زخمی ہو گئے جن کی شناخت محمد کامران ولد محمد اشفاق، عمر 18 سال، اور محمد اشفاق ولد غلام رسول، عمر 60 سال، دونوں رہائشی جلال پور کے طور پر ہوئی ہے۔
ریسکیو ٹیم فوری طور پر موقع پر پہنچ گئی اور ابتدائی طبی امداد فراہم کرنے کے بعد زخمیوں کو RHC مبارک پور منتقل کر دیا گیا جہاں انہیں مزید طبی سہولیات مہیا کی گئیں۔
حادثے کی وجہ سڑک پر آوارہ کتوں کی موجودگی بتائی جا رہی ہے، جو مسافروں کی زندگیوں کے لیے مستقل خطرہ بن چکے ہیں۔ شہریوں اور مسافروں نے متعلقہ اداروں سے مطالبہ کیا ہے کہ وہ سڑکوں پر آوارہ کتوں کی روک تھام کے لیے فوری اقدامات کریں تاکہ آئندہ ایسے جان لیوا حادثات سے بچا جا سکے۔
