ایم کیو ایم کراچی اور حیدر آباد میں قومی اسمبلی کی نشستوں پر کلین سوئپ کرے گی ، ایم کیو ایم

ہمیں لیول پلیئنگ فیلڈ پیپلزپارٹی سے چاہئے۔میڈیا سے گفتگو کرتے ہوئے مصطفیٰ کمال نے کہا کہ پیپلز پارٹی 15 سال میں ایک یو سی کو ماڈل نہیں بنا سکی، بلاول بھٹو لاہور میں کھڑے ہو کر یہ نہیں کہہ سکتے کہ لاہور کو کراچی جیسا بنا دیں گے، کراچی میں بجلی، پانی اور گیس نہیں ہے، پیپلز پارٹی نے کراچی کو بدترین شہر بنا دیا ہے۔مصطفیٰ کمال نے کہا کہ آج کل جماعت اسلامی کے لیے بانی پی ٹی آئی مسلمان ہیں، جب ان کا بانی پی ٹی آئی سے کام نکل جائے گا تو وہ بھی ان کے لیے کافر ہو جائیں گے۔ایم کیو ایم کے سینئر ڈپٹی کنوینئر نے کہا کہ ایم کیو ایم سندھ کی بڑی جماعت بن کر الیکشن میں ابھرے گی، انہوں نے کہا کہ میرے ترقیاتی کاموں کا کریڈٹ بھی نعمت اللہ خان کو دیا جا رہا ہے، جماعت اسلامی کا بس چلے تو کہہ دیں ملک بھی جماعت اسلامی نے بنایا تھا۔انہوں نے کہا کہ کراچی شہرمیں ترقیاتی کام ایم کیو ایم دورمیں ہوئے، 22 ہزار ارب خرچ ہونے کے بعد بھی ہسپتالوں میں ادویات نہیں ہیں۔ جبکہ کراچی کے حلقہ این اے 244 میں کاغذات نامزدگی جمع کرانے کے بعد میڈیا سے گفتگو کرتے ہوئے انہوں نے کہا کہ ایم کیو ایم نوجوانوں کو موقع دے رہی ہے۔ انہوں نے کہا کہ ایم کیو ایم میں عوامی حلقے ہیں اور منشور تیاری کے آخری مراحل میں ہے۔فاروق ستار نے کہا کہ ایم کیو ایم کے بنیادی مطالبے کو مان کر کاغذات نامزدگی کیلئے وقت بڑھایا گیا۔ ہم الیکشن کمیشن کا شکریہ ادا کرتے ہیں۔
فاروق ستار نے کہا انتخابات سے پہلے مذاکرات ہونے چاہیئیں، قومی مفاہمت اور اتفاق ہونا چاہیے۔ ان کا کہنا تھا کہ عوام کے مسائل حل کرنے کےلیے اضلاع کو بااختیار بنانا ہوگا۔