واضح ہو گیا پاکستان اب بین الاقوامی سطح پر ایک قائدانہ کردار ادا کر رہا ہے،خالد مسعود سندھو
پاکستان مرکزی مسلم لیگ کے صدر خالد مسعود سندھو نے کہا ہے کہ فیلڈ مارشل سید عاصم منیر کی امریکی صدر ڈونلڈ ٹرمپ سے ملاقات نہ صرف پاکستان بلکہ پورے خطے کے لیے ایک اہم پیش رفت ہے،یہ ملاقات اس بات کا واضح ثبوت ہے کہ پاکستان اب بین الاقوامی سطح پر ایک قائدانہ کردار ادا کر رہا ہے، جبکہ بھارت کا خطے کا ٹھیکیدار بننے کا خواب چکنا چور ہو گیا،خطے میں امن کے حوالہ سے پاکستان کا کردار کسی سے ڈھکا چھپا نہیں، حالیہ دنوں میں مسئلہ کشمیر بھی دنیا بھر میں اجاگر ہوا ہے،پاکستانی قوم متحد اور دشمن کیخلاف افواج پاکستان کے شانہ بشانہ کھڑی ہے.
خالد مسعود سندھو کا کہنا تھا کہ جی سیون اجلاس کے دوران امریکی صدر نے بھارتی وزیر اعظم نریندر مودی سے ملاقات نہیں کی، جو بھارت کی سفارتی ناکامی کا واضح اشارہ ہے، اس کے برعکس فیلڈ مارشل عاصم منیر کی صدر ٹرمپ سے وائیٹ ہاؤس میں ملاقات اس بات کی عکاسی کرتی ہے کہ پاکستان کا ابھرتا ہوا کردار اب دنیا تسلیم کر رہی ہے، ملاقات کے دوران فیلڈ مارشل عاصم منیر نے ایران اسرائیل کشیدگی اور غزہ کی صورتحال جیسے نازک معاملات پر نہایت تدبر اور بصیرت سے گفتگو کی، یہ اس بات کا ثبوت ہے کہ پاکستان ایک ذمہ دار ریاست اور امن کا خواہاں ہے،
خالد مسعود سندھو کا مزید کہنا تھا کہ بھارت نے ہمیشہ پروپیگنڈے، جھوٹ اور الزام تراشی کے ذریعے نہ صرف اپنی عوام کو گمراہ کیا بلکہ عالمی برادری کو بھی دھوکا دینے کی کوشش کی، تاہم پاکستان نے ہر موقع پر ذمہ دارانہ طرز عمل اختیار کیا۔ پہلگام ڈرامے کے اگلے ہی دن پاکستان نے تحقیقات کی پیشکش کی، مگر مودی سرکار نے جنگ مسلط کی تاہم پاکستان نے بھارت کو منہ توڑ جواب دیا، بھارت کی جانب سے پاکستان میں دہشت گردی و تخریب کاری کوئی ڈھکی چھپی بات نہیں رہی، اس کے ثبوت پاکستان کئی بار عالمی فورمز پر پیش کر چکا ہے،پاکستان نے دہشت گردی کے خلاف نہ صرف جنگ لڑی بلکہ کامیابی بھی حاصل کی، پاکستان امت کا پشتبان ہے،امت کا پشتی بان ،مضبوط پاکستان مرکزی مسلم لیگ کا نعرہ ہے، مرکزی مسلم لیگ قوم کو متحد کرنے میں کردار ادا کرتی رہے گی،
