Ayesha Rehmani
راولپنڈی:پولیس نے 18 سالہ لڑکی کو ہراساں کرنے والے ملزم کو گرفتار کرلیا۔
متاثرہ لڑکی کے والد نے وارث خان پولیس کو درخواست دی کہ ملزم راشد محمود میری بیٹی کو ہراساں کرتا ہے۔ پولیس نے والد کی درخواست پر مقدمہ درج کرکے ملزم راشد محمود کو گرفتار کیا۔
ایس پی راول فیصل سلیم کے مطابق گرفتار ملزم کو ٹھوس شواہد کے ساتھ چالان کر کے قرارو اقعی سزا دلوائی جائے گی خواتین اور بچوں کے ساتھ ہراسمنٹ، زیادتی ناقابل برداشت ہے، ملوث ملزمان قانون کی گرفت سے نہیں بچ سکتے۔
علاوہ ازیں کراچی کے علاقے ملیر کینٹ کے قریب گھر سے تشدد کا شکار لڑکی کو پولیس نے بازیاب کرالیا،ایس ایس پی ملیر کاشف عباسی کے مطابق متاثرہ لڑکی نے اپنے والد، والدہ اور بھائیوں پر تشدد کا الزام لگایا ہے، متاثرہ لڑکی فیملی کے ساتھ نہیں جانا چاہ رہی، لڑکی نے اپنی تشدد زدہ تصاویر بھی سوشل میڈیا پر شیئر کی تھیں، متاثرہ لڑکی کا بھائی گھر پر نہیں تھا، لڑکی کے اہل خانہ سے پوچھ گچھ کر رہے ہیں۔
متاثرہ لڑکی نے کہا کہ میں پچھلے 10 سالوں سے قطر میں رہ رہی ہوں، میرا بھائی اور میری والدہ مجھ پر تشدد کرتے ہیں، والد اور دوسرا بھائی سب جانتے ہوئے بھی مدد نہیں کرتے،ایک ہفتے قبل میری والدہ نے میری جان لینے کی کوشش کی، ایس ایس پی ملیر نے مجھے بازیاب کراکر تھانے منتقل کیا، ایس ایس پی اور ان کی ٹیم کا میں شکر گزار ہوں، میں واپس قطر جاکر اپنی تعلیم مکمل کرنا چاہتی ہوں۔
