ملتان: سرکاری زمین پر ڈی سی کی اجازت سے جنازہ گاہ کی تعمیر،شہری کو جان لیوا دھمکیاں

ملتان (نامہ نگار) سرکاری زمین پر ڈی سی کی اجازت سے جنازہ گاہ کی تعمیر،شہری کو جان لیوا دھمکیاں،چک نمبر 91 بدھلہ سنت کے رہائشی محمد سرفراز ولد قاسم نے تھانہ بدھلہ سنت کے SHO کو ایک درخواست جمع کروائی ہے، جس میں اس نے اپنی اور اہلِ علاقہ کی جان کو لاحق خطرات کے حوالے سے تحفظ کی اپیل کی ہے۔

تفصیلات کے مطابق محمد سرفراز نے اپنے محلے میں سرکاری زمین پر ڈی سی ملتان کی اجازت سے اہلِ علاقہ سے چندہ اکٹھا کر کے ایک جنازہ گاہ تعمیر کی تھی۔ تاہم اس اقدام کے بعد علاقے کے چند افراد جن میں جمیلہ مائی، محمد دانش اور نعمان شامل ہیں نے سرفراز کو جان سے مارنے کی دھمکیاں دینا شروع کر دی ہیں۔

سرفراز کا کہنا ہے کہ انہوں نے معززینِ علاقہ کے ہمراہ کئی بار ملزمان کو سمجھانے کی کوشش کی لیکن وہ اپنی حرکتوں سے باز نہ آئے۔ حالیہ واقعہ میں ملزمان نے سرفراز کا پیچھا کیا، جس کے بعد وہ اپنی جان بچانے کے لیے اپنے گھر میں چھپ گئے۔ ملزمان ان کے گھر تک پہنچ گئے اور وہاں بھی انہیں جان سے مارنے کی دھمکیاں دیتے رہے۔ تاہم مقامی افراد محمد شہباز اور اللہ بخش کی مداخلت کے باعث سرفراز کی جان بچائی گئی۔

مزید برآں 27 ستمبر 2024 کو سرفراز نے بتایا کہ وہ اپنے گھر سے باہر کام کے لیے جا رہے تھے جب ملزم نعمان نے انہیں دوبارہ گالم گلوچ اور دھمکیاں دیں کہ ان کی موت کا انتظام ہو چکا ہے۔

محمد سرفراز نے پولیس سے درخواست کی ہے کہ ملزمان کے خلاف قانونی کارروائی کی جائے اور انہیں اور اہلِ علاقہ کو تحفظ فراہم کیا جائے، کیونکہ وہ ملزمان کے ظلم و جبر سے شدید خوفزدہ ہیں۔

پولیس نے واقعے کی تحقیقات شروع کر دی ہیں اور مزید قانونی کارروائی کی جا رہی ہے۔