ڈسٹرکٹ اینڈ سیشن کورٹ اسلام آباد میں ضمانت قبل از گرفتاری کی درخواست پر سماعت کے دوران اس وقت دلچسپ صورت حال دیکھنے میں آئی جب ملزم کی جگہ اس کا دوست حاضری لگانے کے لیے عدالت میں پیش ہوگیا۔
ملزم بلال خان کی ضمانت قبل از گرفتاری کی درخواست پر سماعت ڈسٹرکٹ اینڈ سیشن کورٹ اسلام آباد جہانگیر اعوان کی عدالت میں ہوئی جہاں ملزم بلال خان کی جگہ اس کا دوست شاہد کریم عدالت میں پیش ہو گیا۔ایڈیشنل سیشن جج جہانگیر اعوان نے ملزم کی گرفتاری کا حکم دیا تو ملزم کے دوست نے ڈر کر سچ بول دیا، عدالت نے ملزم بلال کے دوست شاہد کریم کی گرفتاری کا حکم دے دیا۔
عدالت نے مچلکے جمع نہ کرانے پر ضمانت قبل از گرفتاری خارج کر دی اور ملزم بلال خان کو بھی گرفتار کرنےکا حکم دیا۔عدالت کے گرفتاری کے حکم پر شاہد کریم نے بتایا وہ اصلی ملزم بلال نہیں، ملزم کے گرفتار دوست نے عدالت کو بتایا کہ مجھے بلال خان نےکہا تھا پیش ہو جانا، کچھ نہیں ہو گا۔
