راولپنڈی: انسداد دہشتگردی عدالت نے اڈیالہ جیل کے باہر صحافیوں پر تشدد کیس میں گرفتار ملزمان کو شناخت پریڈ کے لیے جیل بھیج دیا۔
تفصیلات کے مطابق راولپنڈی کی انسداد دہشتگردی عدالت میں کیس کی سماعت ہوئی جس دوران پولیس نے گرفتار ملزمان راجہ سرفراز اور چوہدری نوید کو عدالت میں پیش کیا۔ سماعت کے دوران عدالت نے حکم دیا کہ دونوں ملزمان کو شناخت پریڈ کے لیے جیل منتقل کیا جائے تاکہ متاثرہ صحافی اور عینی شاہدین کی موجودگی میں ملزمان کی شناخت عمل میں لائی جا سکے۔
یاد رہے کہ گزشتہ روز اڈیالہ جیل کے باہر اُس وقت صورتحال کشیدہ ہوگئی تھی جب پاکستان تحریک انصاف کی رہنما علیمہ خان میڈیا سے گفتگو کر رہی تھیں۔ اس دوران موجود پی ٹی آئی کارکنان نے صحافیوں پر مبینہ طور پر تشدد کیا جس سے متعدد صحافی زخمی ہوئے۔ واقعے کی فوٹیجز سوشل میڈیا پر وائرل ہونے کے بعد صحافتی حلقوں اور مختلف تنظیموں نے شدید احتجاج کیا۔بعد ازاں متاثرہ صحافی کی مدعیت میں تھانہ صدر بیرونی پولیس اسٹیشن میں علیمہ خان، نعیم پنجوتھہ اور 40 نامعلوم افراد کے خلاف مقدمہ درج کیا گیا۔ مقدمے میں دہشتگردی، تشدد اور کارِ سرکار میں مداخلت کی دفعات شامل کی گئی ہیں۔پولیس حکام کے مطابق واقعے میں ملوث مزید افراد کی گرفتاری کے لیے چھاپے مارے جا رہے ہیں جبکہ گرفتار ملزمان کو شناخت پریڈ کے بعد دوبارہ عدالت میں پیش کیا جائے گا۔
