سابق وزیر اعلی سندھ مراد علی شاہ اور صوبائی وزیر شرجیل میمن کے اثاثوں کے تفصیلات سامنے آگئے

سابق وزیر اعلی سند ھ مراد علی شاہ کے رواں سال اثاثوں میں 10 کروڑ سے زائد کمی آئی ہے ۔ ان کے اثاثوں کی مالیت 24 کروڑ 75 لاکھ 88 ہزار 470 روپے ہے۔ دستاویز کے مطابق مراد علی شاہ کے پاس کراچی میں 16 کروڑ 66 لاکھ کا پلاٹ بھی ہے۔ اسکے علاوہ ان کے پاس ایک کروڑ 42 لاکھ روپے کی 2 گاڑیاں بھی ہیں۔ دستاویز کے مطابق مراد علی شاہ کو ایک کروڑ 75 لاکھ روپے مالیت کے تحفے ملے۔ ‎مراد علی شاہ کے اثاثوں میں51 ایکڑ زمین اور کراچی میں گھر شامل ہے۔دستاویز کے مطابق مراد علی شاہ کی اہلیہ کے پاس تحفے کا 100 تولہ سونا بھی ہے۔ مراد علی شاہ کے مختلف اکاؤنٹس میں21 کروڑ 88 لاکھ 38 ہزار 470 روپے موجود ہیں۔ دستاویز کے مطابق مراد علی شاہ نے سال 23-2022 میں1 کروڑ 22 لاکھ روپے سے زائد کا انکم ٹکیس ادا کیا۔ انہوں نے سال 23-2022 میں 80 لاکھ 45 ہزار روپے کا زرعی ٹیکس ادا کیا۔ اسی طرح پاکستان پیپلز پارٹی (پی پی پی) کے رہنما شرجیل انعام میمن کے اثاثوں کی تفصیلات بھی سامنے آگئیں۔دستاویز کے مطابق شرجیل میمن کے پاس کراچی میں 10 کروڑ روپے مالیت کا بنگلہ ہے، شرجیل میمن کی کراچی میں 44 لاکھ اور 97 لاکھ کی دو جائیدادیں ہیں۔
تھرپارکر میں 11 ایکڑ سے زائد 16 لاکھ 80 ہزار کی زرعی زمین بھی ہے، شرجیل میمن کی راہوکی میں ایک کروڑ 12 لاکھ روپے مالیت کی زرعی زمین ہے۔دستاویز کے مطابق شرجیل میمن کا تھرپارکر میں 17 لاکھ روپے مالیت کا مکان بھی ہے۔پی پی رہنما کے پاس ساڑھے 4 کروڑ روپے کا پیٹرول پمپ بھی ہے، جبکہ انکا 1 کروڑ روپے مالیت کا پولٹری فارم بھی ہے۔ سابق صوبائی وزیر کے پاس ایک کروڑ 77 لاکھ 50 ہزار روپے کی 3 گاڑیاں ہیں، جبکہ انکی اہلیہ کے پاس 100 تولہ سونے کی مالیت 3 لاکھ روپے ظاہر کی گئی۔دستاویز کے مطابق شرجیل میمن کی اہلیہ کے نام پر یو اے ای میں 3 بزنسز ہیں۔شرجیل میمن اور انکی اہلیہ کے پاس ایک کروڑ 82 لاکھ روپے سے زائد کیش موجود ہے۔ علاوہ ازیں شرجیل میمن نے 75 لاکھ روپے مالیت کے ذاتی ہتھیار ظاہر کیے، شرجیل میمن کے مقامی اور بیرون ملک بینک اکاؤنٹس میں 17 کروڑ 7 لاکھ 94 ہزار روپے سے زائد موجود ہیں۔ پی پی رہنما نے سال 23-2022 میں 7 کروڑ 29 لاکھ روپے سے زائد انکم ٹیکس ادا کیا۔