اوچ شریف،ڈیرہ غازیخان(باغی ٹی وی نمائندگان)صحافی اشفاق احمد کے قتل پر صحافی برادری میں غم و غصہ،آرپی او ڈی جی خان اور وزیراعلی پنجاب کانوٹس
تفصیل کے مطابق مظفرگڑھ کے سینئر صحافی اشفاق احمد کے قتل پر جنوبی پنجاب ڈی جی خان سمیت اوچ شریف کے صحافی برادری شدیدغم و غصہ میں مبتلا ہوگئی ہے سینئر صحافی اشفاق احمد مظفرگڑھ میں روز نامہ خبریں میں اپنے فرائض انجام دے رہے تھے جن پرنامعلوم مسلح افراد نے ان فائرنگ کر دی۔ انہیں شدید زخمی حالت میں ہسپتال منتقل کیا گیا ہے، مگر ڈاکٹروں کے مطابق زیادہ خون بہہ جانے کی وجہ سے وہ جان کی بازی ہار گئے۔
جنوبی پنجاب ڈیرہ غازیخان سمیت اوچ شریف کے صحافیوں نے ان کے قتل پر شدید الفاظ میں مذمت کی ہے۔صحافی برادری کا کہنا ہے کہ اگر آئندہ چوبیس گھنٹوں کے اندر قاتلوں کو گرفتار نہیں کیا گیا تو پورے پاکستان میں احتجاج کیا جائے گا۔
اوچ شریف کے سینئر صحافی اظہر علی دانش احمد حسن اعوان میاں محمد عامر صدیقی خواجہ غلام شبیر سید مجتہد رضوی حبیب خان عامر غنی خان لنگاہ ساجد خان ملک یعقوب ککس ملک زاہد صابر شمس خان رند لیاقت بلوچ دیگر عہدیداران کا کہنا تھاکہ سینئر صحافی اشفاق احمد سیال کا قتل انتہائی قابل مذمت ، افسوسناک اور دہشت گردانہ فعل ہے ۔ ہم مقتول صحافی کے ورثاء کے غم میں برابر کے شریک ہیں ۔
بدقسمتی سے صحافی اس وقت عدم تحفظ کا شکار ہوچکے ہیں مگر حکومت صحافیوں کے تحفظ کے لیے کوئی عملی اقدام نہیں کررہی انہوں کہا کہ آئے روز صحافیوں کو ڈرانے دھمکانے اور قتل کے واقعات تشویشناک ہیں ان حالات میں صحافیوں کے لیے اپنے فرائض ادا کرنا مشکل ہو جاتا ہے ۔
انہوں نے صدر پاکستان آصف علی زرداری وزیر اعظم پاکستان شہباز شریف وزیراعلی پنجاب مریم نواز شریف، سے مطالبہ کیا ہے کہ صحافی اشفاق احمد سیال کے قاتلوں کو فوری طور پر قانون کے کٹہرے میں لایا جائے ،حکومت پاکستان کو چاہیے کہ صحافیوں کو پروٹیکشن دے تاکہ صحافی اپنا کام بخوبی سر انجام دے سکیں
ادھر آر پی او ڈیرہ غازی خان کیپٹن (ر)سجادحسن خان نے مظفر گڑھ میں صحافی مہر اشفاق کے قتل کا نوٹس لے لیا ہے ، ڈی پی او مظفر گڑھ سے واقعہ کی فوری رپورٹ طلب کرلی ہے،ڈی پی او مظفر گڑھ کو مجرمان کی فوری گرفتار ی یقینی بنانے کے احکامات اور ملزمان کی گرفتاری کے لیے خصوصی ٹیمیں تشکیل دینے کا حکم ۔
آر پی او ڈیرہ غازی خان کیپٹن (ر)سجادحسن خان نے واقعہ کی مکمل جدیدسائنسی بنیادوں پر تفتیش کے احکامات جاری کئے ہیں،ڈی پی او مظفر گڑھ کو لواحقین کے قریبی رابطہ رکھنے کا حکم
آر پی او نے کہا کہ ظلم و زیادتی کرنے والے کسی رعائیت کے مستحق نہیں ہیں ،واقعہ میں ملوث مجرمان کو گرفتارکر کے قرار واقعی سزا دلوائی جائے اور دکھ کی اس گھڑی میں متاثرہ خاندان کے ساتھ ہیں، لواحقین کو انصاف کی فراہمی یقینی بنائی جائےگی
دوسری جانب وزیراعلیٰ پنجاب مریم نواز نے مظفرگڑھ میں صحافی اشفاق احمدکےقتل کا نوٹس لیتے ہوئے آئی جی پنجاب سے رپورٹ طلب کرلی۔
مریم نواز نے ہدایت کی ہےکہ صحافی اشفاق احمد کے قتل میں ملوث افرادکو قانون کی گرفت میں لایا جائے۔
