میرپور ماتھیلو (باغی ٹی وی، نامہ نگار مشتاق علی لغاری) گھوٹکی کے علاقہ مرید شاخ میں زانگ اور موبی لنک جاز کی انٹرنیٹ اور فون سروس 18 دن سے مکمل طور پر معطل ہے۔ شہریوں کو شدید مشکلات کا سامنا ہے جبکہ انتظامیہ کی خاموشی پر عوام نے احتجاج کی کال دے دی۔
انٹرنیٹ سروس کی معطلی کی وجہ سے کاروباری شخصیات اور آن لائن کلاسز لینے والے طلبہ سب سے زیادہ متاثر ہوئے ہیں۔ انٹرنیٹ کی بندش کی وجوہات اب تک واضح نہیں ہو سکیں، تاہم اطلاعات کے مطابق سندھ اور پنجاب پولیس کے افسران نے جرائم پر قابو پانے کے لیے انٹرنیٹ اور کالز کی سہولت بند کرنے کا فیصلہ کیا تھا، لیکن اس فیصلے کی کوئی ذمہ داری قبول نہیں کر رہا۔
شہریوں نے اعلیٰ حکام سے فوری نوٹس لینے کا مطالبہ کرتے ہوئے خبردار کیا ہے کہ اگر انٹرنیٹ سروس بحال نہ کی گئی تو احتجاج کا دائرہ بڑھا دیا جائے گا۔
