مسلم لیگ ن کے رہنماؤں نے پی ڈی ایم جلسے کے حوالے سے پنجاب حکومت کو وارننگ دے دی

سابق وزیراعظم اور مسلم لیگ ن کے سینئر نائب صدر شاہد خاقان عباسی نے پی ڈی ایم جلسے کے حوالے سے پنجاب حکومت کو وارننگ دیتے ہوئے کہا کہ اینٹ کا جواب پتھر سے دیں گے۔ شاہد خاقان عباسی نے حکومت پر تنقید کرتے ہوئے کہا کہ پولیس افسران سرکاری ملازم ہیں ذاتی ملازم نہیں، تمام لوگ نوکری کریں، جھوٹے مقدمے نہ بنائیں۔ان کا کہنا تھا کہ 13 دسمبر کو لاہور کا جلسہ تاریخی ہو گا، افسران اگر سیاست میں ملوث ہوں گے تو کل انہیں جواب دینا ہوگا۔ سابق وزیراعظم شاہد خاقان عباسی نے مزید کہا کہ پہلے نیب استعمال ہوا اب اینٹی کرپشن میدان میں ہے۔

ترجمان مسلم لیگ ن مریم اورنگزیب نے کہا ہے کہ عمران صاحب لاہور کا جلسہ بھی ہو گا اور انشاللہ آپ کُرسی بھی چھوڑیں گے۔ بات جلسے سے بڑھ کر آپ کے استعفے تک آ گئی ہے۔وزیراعظم عمران خان کے لاہور جلسہ بارے بیان پہ ردِ عمل میں مریم اورنگزیب نے کہا کہ عمران صاحب اگر لاہور جلسے کا آپ کو فرق نہ پڑتا تو آپ یہ بیان نہ دیتے۔ اپ سیاسی مخالفین کو سزائے موت کی چکیوں میں رکھ کر ایف آئی آر سے ڈرا رہے ہیں، آپ کی غلط فہمی ہے کہ آپ کو ملک کا آٹا، چینی چوری پہ این آر او ملے گا۔ آپ کی یہ بھی غلط فہمی ہے کہ آپ کو معیشت اور روزگار تباہ کرنے پہ این آر او ملے گا۔

مریم اورنگزیب نے کہا کہ اب آپ کو غیر قانونی فارن فنڈنگ کیس میں بھی این آر او نہیں ملے گا، اب آپ کو سقوط کشمیر پہ بھی این آر او نہیں ملے گا۔
مریم اورنگزیب نے کہا کہ عمران صاحب آپ کے سیاسی انتقام کی انتہا نے جیلوں کا خوف ختم کر دیا ہے، ٹی وی لگائیں حالات مختلف ہو گئے ہیں۔ میری مانیں تو ووٹ چوری کے خلاف آپ بھی 12 دسمبر کو استعفیٰ دے کے مینارِ پاکستان آئیں۔ ایف آئی آر تو اب آٹا، چینی، بجلی، گیس، دوائی ، روزگار اور ووٹ چوروں کے خلاف کٹ چکی ہے۔