میئر کراچی مرتضیٰ وہاب نے کہا ہے کہ مصطفیٰ کمال کو کراچی والا ہونے کا حق ادا کرنا چاہیے اور شہر کے مسائل پر عملی اقدامات اٹھانے چاہئیں۔
مرتضیٰ وہاب کا کہنا تھا کہ شہر کے لوگ سحری اور افطار کے وقت گیس کی لوڈشیڈنگ کے مسائل سے پریشان ہیں اور انہوں نے مصطفیٰ کمال اور خالد مقبول صدیقی سے درخواست کی کہ وہ کراچی والوں کی زندگی کو مستحکم بنانے کے لیے اقدامات کریں۔مرتضیٰ وہاب نے وزیرِ اعظم پاکستان سے بھی درخواست کی کہ وہ اپنے وعدوں کو وفا کریں اور کراچی کے مسائل کو حل کرنے کے لیے عملی طور پر آگے آئیں۔ انہوں نے کہا کہ "اگر وزیرِ اعظم وعدہ کرتے ہیں تو انہیں اس پر عمل درآمد کرنا چاہیے۔ ہمیں وفاق سے کے فور منصوبے اور دیگر اہم منصوبوں کے لیے بجٹ کی ضرورت ہے۔ ایم کیو ایم اور جماعت اسلامی کو بھی ہمارے ساتھ مل کر شہر کے مسائل حل کرنے چاہئیں۔”
مرتضیٰ وہاب نے حب ریور روڈ پر کھمبے چوری کرنے کے مسئلے کی طرف بھی اشارہ کیا۔ ان کا کہنا تھا کہ "نشہ آور افراد کے پیچھے ایک متحرک مافیا سرگرم ہے، اور کباڑی مافیا کے خلاف سخت کارروائی کرنے کی ضرورت ہے۔” انہوں نے مزید کہا کہ وہ ایس ایس پی سینٹرل کو ہدایات دے چکے ہیں کہ اگر آئندہ کسی علاقے میں لائٹ چوری کی جائے تو ایس ایچ او پر جرمانہ عائد کیا جائے گا۔ اس کے علاوہ، ناظم آباد تھانے میں اسٹریٹ لائٹس چوری کرنے کے حوالے سے ایف آئی آر بھی درج کروا دی گئی ہے۔
میئر کراچی نے چارجڈ پارکنگ کے حوالے سے بھی بات کرتے ہوئے کہا کہ اس وقت اس سے ساڑھے پانچ کروڑ روپے کی آمدنی ہو رہی ہے۔ تاہم، پارکنگ فری کرنے کا عمل جاری ہے۔ انہوں نے شہر کی اہم شاہراہوں پر گداگری کو روکنے کے لیے اقدامات کرنے کا عزم بھی ظاہر کیا اور کہا کہ اس معاملے کو بہت جلد حل کر لیا جائے گا۔
