وفاقی وزیر صحت سید مصطفی کمال نے صوبائی ایمرجنسی آپریشن سینٹر برائے پولیو کراچی کا دورہ کیا۔
باغی ٹی وی کے مطابق صوبائی ای او سی کے حکام نے وفاقی وزیرکا استقبال کیا۔ترجمان وزارت صحت کے مطابق صوبائی کوآرڈی نیٹر ارشاد علی سوڈھر نے وزیر صحت کو پولیو کی موجودہ صورتحال پر بریفنگ دی۔انہوں نے جاری ویکسینیشن مہمات اور درپیش چیلنجز پر بھی بریفنگ دی۔
ترجمان وزارت صحت کے مطابق وزیر صحت نے ویکسین سے انکاری خاندانوں کے مسئلے پر تفصیلی رپورٹ طلب کر لی۔وزیر صحت نے پولیو کے خاتمے کی قومی مہم میں فرنٹ لائن ورکرز اور ضلعی انتظامیہ کے کردار کو سراہا۔وزیر صحت نے پولیو کے خاتمے کے لیے تمام وسائل بروئے کار لانے کی ہدایت بھی کی۔وفاقی وزیر صحت سید مصطفی کمال نے کہاکہ پولیو کا مکمل خاتمہ قومی ترجیح ہے، پولیو فری پاکستان کے لیے مزید جدید اور مربوط حکمت عملی اپنانا ناگزیر ہے۔
انہوں نے کہاکہ پولیو کے مکمل خاتمے کے لیے وفاقی حکومت سندھ کے شانہ بشانہ کھڑی ہے۔وزیر صحت نے رواں سال کے 6 میں سے 4 پولیو کیسز سندھ سے ہونے پر تشویش کا اظہار کیا۔انہوں نے کہاکہ سندھ میں 43,000 والدین ویکسینیشن سے انکاری ہیں جن میں سے تقریبا 42,000 کراچی سے ہیں ۔والدین سے اپیل ہے کہ اپریل کی قومی پولیو مہم بچوں کو پولیو کے قطرے ضرور پلائیں۔
والدین کی مدد سے ملک کو پولیو کی مرض سے پاک کرنا ہے ۔مصطفی کمال نے کہاکہ کراچی کے سیوریج کے نمونوں میں پولیو وائرس کی مسلسل موجودگی پرتشویش ہے۔پولیو وائرس کے پھیلائو کو روکنے کے لیے کمیونٹی انگیجمنٹ اور ویکسینیشن مہم کو مزید موثر بنایا جائے۔سندھ کے پولیو کوارڈینیٹر ارشاد علی نے وفاقی وزیرصحت کو بتایاکہ سندھ سے پولیو کے خاتمے کیلیے موثر اقدامات کو یقینی بنارہے ہیں ۔کراچی کے تمام اسٹیک ہولڈرز کے ساتھ مل کر ایسی حکمت عملی تیار کی جا رہی ہے جس سے کوئی بچہ ویکسین سے محروم نہ رہے.
