ڈاکٹرغلام مصطفی بڈانی
ننکانہ صاحب،باغی ٹی وی( نامہ نگار احسان اللہ ایاز)ننکانہ صاحب میں پاکستان مرکزی مسلم لیگ کے زیراہتمام بھارتی آبی جارحیت اور شرانگیزی کے خلاف ایک احتجاجی مظاہرہ کیا گیا۔
مظاہرہ ننکانہ صاحب پریس کلب کے سامنے منعقد ہوا، جس میں پاکستان مرکزی مسلم لیگ کے عہدیداران، سیاسی و سماجی رہنماؤں، وکلاء، اور شہریوں کی بڑی تعداد نے شرکت کی۔ شرکاء نے ہاتھوں میں بینرز اور پلے کارڈز اٹھا رکھے تھے، جن پر بھارتی آبی جارحیت، سندھ طاس معاہدے کی یکطرفہ غیر قانونی منسوخی، اور پاکستان پر جھوٹے الزامات کے خلاف نعرے درج تھے۔ مظاہرین نے "بھارت مردہ باد”، "پاکستان زندہ باد”، اور "پاک فوج زندہ باد” کے نعرے بھی لگائے۔
اس موقع پر عطاء اللہ غلزئی (صدر مسلم ٹیچرز فورم پاکستان)، ثاقب مجید (جنرل سیکرٹری پاکستان مرکزی مسلم لیگ، ڈسٹرکٹ ننکانہ صاحب)، میاں عابد (ضلع صدر پاکستان مرکزی مسلم لیگ، ڈسٹرکٹ ننکانہ صاحب) سمیت دیگر مقررین نے خطاب کیا۔ انہوں نے کہا کہ بھارت کی جانب سے سندھ طاس معاہدے کی یکطرفہ منسوخی غیر قانونی ہے، اور اقوام متحدہ کو اس کا نوٹس لینا چاہیے۔ انہوں نے مزید کہا کہ بھارت ماضی میں بھی کئی بار جھوٹے الزامات لگا کر اس معاہدے کو منسوخ کرنے کی کوشش کر چکا ہے۔
مقررین نے الزام عائد کیا کہ بھارت نے ایک بار پھر ڈرامہ رچا کر الزام پاکستان پر لگایا ہے۔ انہوں نے کہا کہ پاکستان کی امن پسندی کو کمزوری نہ سمجھا جائے۔ ان کا کہنا تھا کہ بھارت بلوچستان سمیت پاکستان کے حالات خراب کرنے میں براہ راست ملوث ہے، اور اس کے ناقابلِ تردید ثبوت کئی بار سامنے آ چکے ہیں۔
مظاہرین اور مقررین نے قومی سلامتی کونسل کی جانب سے بھارت کو بروقت اور بھرپور ردعمل دینے پر حکومت اور عسکری قیادت کو خراجِ تحسین پیش کیا۔ انہوں نے عزم کا اظہار کیا کہ پوری قوم آزمائش کی ہر گھڑی میں اپنی بہادر افواج کے شانہ بشانہ کھڑی ہوگی۔
