نادرا کا ایک اور کارنامہ سامنے آ گیا، بھارتی شہری کو شناختی کارڈ جاری کر دیا، ایف آئی اے نے بھارتی شہری کو گرفتار کر لیا
باغی ٹی وی کی رپورٹ کے مطابق پاکستان کے قومی تحقیقاتی ادارے ایف آئی اے نے پنجاب کے شہر گوجرانوالہ سے ایک بھارتی شہری کو گرفتار کیا ہے جس کے بارے میں انکشاف ہوا ہے کہ نادرا نے اسے پاکستان کا قومی شناختی کارڈ جاری کیا ہوا ہے.
ایف آئی اے نے گوجرانوالہ سے ملزم پنجم تیواری کو گرفتار کیا جس نے ایف آئی اے کو بیان دیتے ہوئے کہا کہ 2009 میں پاکستانی شہری کامران کے ساتھ دبئی میں کاروبار کیا،کامران کے پھوپھا مسعودنے اپنا بیٹاظاہرکرکے شناختی کارڈدلوایا،اورنیانام بلال رکھ دیا،
بھارتی شہری نے پاکستانی شہری کامران کی بہن سے شادی بھی رچا لی، ملزم غیر قانونی طریقے سے پاکستان آیا اور گوجرانوالہ میں دوست کے گھر رہا، ایف آئی اے نے ملزم کے خلاف تحقیقات شروع کر دی ہیں اور مقدمہ درج کر لیا ہے، ایف آئی اے نے مقدمہ میں ملزم کی مدد کرنے والے افراد کے خلاف بھی مقدمہ درج کیا ہے، ایف آئی نے بھارتی شہری کو قومی شناختی کارڈ جاری کرنے پر نادرا ملازمین سے بھی تحقیقات کرنے کا فیصلہ کیا ہے.
واضح رہے کہ دو ماہ قبل قومی اسمبلی کے سیشن کے دوران وقفہ سوالات میں وزیر داخلہ اعجاز شاہ نے ایوان کو بتایا تھا کہ غیرملکیوں کو قومی شناختی کارڈ جاری کرنے پر نادرا سے 120 ملازمین برطرف کئے گئے جبکہ جعل سازی پر 9554 قومی شناختی کارڈز منسوخ کیے جاچکے ہیں۔ ایک لاکھ سے زائد مشکوک آئی ڈی کارڈ بلاک کیے جاچکے ہیں۔
ایک رپورٹ کے مطابق نادرا کی جانب سے 603 غیر ملکیوں کو بھی قومی شناختی کارڈز جاری کیے گئے۔
