ننکانہ صاحب، باغی ٹی وی(نامہ نگار ، احسان اللہ ایاز) پاکستان مرکزی مسلم لیگ کے مرکزی صدر خالد مسعود سندھو ایڈووکیٹ نے ملک کو بحرانوں سے نکالنے اور مسائل کے حل کیلئے گرینڈ جرگے کا مطالبہ کیا ہے۔ انہوں نے تمام سیاسی قیادت اور سٹیک ہولڈرز کو اس جرگے میں شرکت کی دعوت دی ہے۔
خالد مسعود سندھو نے کہا کہ یہ وقت آپس میں لڑنے کا نہیں ہے، بلکہ تمام سیاسی جماعتوں کو ملکی مفاد میں اکٹھا ہونا چاہیے۔ انہوں نے دہشت گردی کے تدارک اور ملک کو قرضوں کے بوجھ سے نکالنے کیلئے مشترکہ کوششوں پر زور دیا۔ انہوں نے ناکام حکومتی پالیسیوں کو ملکی حالات کی خرابی کا ذمہ دار ٹھہرایا۔
مرکزی مسلم لیگ کے صدر نے کہا کہ ان کی جماعت اقتدار میں آئے بغیر خدمت کی سیاست کر رہی ہے اور ننکانہ صاحب سمیت ملک بھر میں متعدد فلاحی منصوبے چلا رہی ہے۔ انہوں نے کہا کہ ان منصوبوں میں لوگوں کی خدمت کے ساتھ ساتھ انہیں باعزت روزگار کے طریقے بھی سکھائے جاتے ہیں۔
خالد مسعود سندھو نے کہا کہ مرکزی مسلم لیگ قوم کے اتحاد کیلئے کوشاں ہے اور انہوں نے گرینڈ جرگے کیلئے صدر مملکت کو خط لکھا ہے۔ انہوں نے کہا کہ اس جرگے میں تمام سیاسی قیادت اور سٹیک ہولڈرز کو بلایا جائے اور ملک کو بحرانوں سے نکالنے کیلئے حکمت عملی بنائی جائے۔ انہوں نے خبردار کیا کہ جو لوگ اس جرگے میں نہیں آئیں گے، قوم ان کا احتساب کرے گی۔
مرکزی مسلم لیگ کے صدر نے جعفر ایکسپریس پر حملے کو قومی سانحہ قرار دیا اور اس واقعے پر سیاست کرنے والوں کی مذمت کی۔ انہوں نے خیبر پختونخواہ میں بارہ سال حکومت کرنے والوں پر امن قائم کرنے میں ناکامی کا الزام لگایا۔
خالد مسعود سندھو نے اعلان کیا کہ ان کی جماعت قوم کو اکٹھا کرنے کیلئے عید کے بعد مہم شروع کرے گی۔
