ننکانہ صاحب (باغی ٹی وی،نامہ نگار احسان اللہ ایاز) ڈپٹی کمشنر ننکانہ صاحب، محمد تسلیم اختر راؤ، کی زیرِ صدارت گندم ذخیرہ کرنے والوں اور مہنگی اشیاء فروخت کرنے والوں کے خلاف سخت کریک ڈاؤن کا فیصلہ کیا گیا ہے۔
ایک اہم اجلاس میں ڈپٹی کمشنر نے فلور ملز اور ڈیلرز کو آج سہ پہر 3 بجے تک گندم کا تمام سٹاک ظاہر کرنے کا حکم دیا۔ انہوں نے واضح کیا کہ مقررہ وقت کے بعد سٹاک نہ بتانے والوں کے خلاف سخت قانونی کارروائی کی جائے گی۔ اجلاس میں یہ بھی فیصلہ کیا گیا کہ مہنگی اشیاء فروخت کرنے والے اور ذخیرہ اندوز براہِ راست جیل جائیں گے۔
قیمتیں اور دستیابی یقینی بنانے کے اقدامات:
آٹے کی قیمت: 10 کلو آٹے کا تھیلا 905 روپے اور 20 کلو کا تھیلا 1810 روپے میں دستیاب ہوگا۔
قیمتوں کا ڈسپلے: تمام دکانداروں کو ہدایت کی گئی ہے کہ وہ اپنی دکانوں کے باہر آٹے اور چینی کی قیمتیں نمایاں طور پر آویزاں کریں۔
روٹی کی قیمت: ضلع بھر میں روٹی کی قیمت 14 روپے مقرر کی گئی ہے۔ خلاف ورزی کرنے والوں کے خلاف فوری ایکشن لیا جائے گا۔
پرائس مجسٹریٹس کا عمل: پرائس مجسٹریٹس آج سہ پہر 3 بجے کے بعد فیلڈ میں نکل کر قیمتوں کی نگرانی کریں گے۔
ڈپٹی کمشنر نے مزید کہا کہ گندم کو ایک جگہ سے دوسری جگہ منتقل کرنے کے لیے انتظامیہ کی اجازت لازمی ہوگی۔ انہوں نے یقین دہانی کرائی کہ ضلع میں گندم کا وافر سٹاک موجود ہے اور فلور ملز اپنی ضرورت کے مطابق گندم خرید سکتی ہیں۔
