ننکانہ صاحب،باغی ٹی وی(نامہ نگاراحسان اللہ ایاز) وزیر اعلیٰ پنجاب مریم نواز شریف کی ہدایت پر ڈپٹی کمشنر محمد تسلیم اختر راؤ نے سستے رمضان سہولت بازار کا دورہ کیا، جہاں صحافی برادری اور ضلعی افسران بھی ان کے ہمراہ تھے۔
دورے کے دوران اسسٹنٹ کمشنر وجہیہ ثمرین، مرکزی نائب صدر جرنلسٹس ایسوسی ایشن پاکستان (یوکے) سمیع اللہ عثمانی، چیئرمین ایمرا چوہدری محمد رمضان، سینئر نائب صدر پریس کلب چوہدری ریاض احمد، چیف میونسپل آفیسر راؤ انوار سمیت دیگر ضلعی افسران بھی موجود تھے۔
ڈپٹی کمشنر نے رمضان بازار میں اشیائے خورونوش کی کوالٹی، نرخوں اور انتظامات کا تفصیلی جائزہ لیا اور کہا کہ ضلع بھر میں تین رمضان بازار اور 12 سیل پوائنٹس مکمل فعال ہیں، جہاں عوام کو آٹا، چینی، چکن، گوشت، سبزیاں اور دیگر اشیاء مارکیٹ سے کم قیمت پر فراہم کی جا رہی ہیں۔
انہوں نے بتایا کہ چینی 130 روپے فی کلو، چکن 20 سے 22 روپے اور بیف و مٹن 50 روپے فی کلو تک رعایتی نرخوں پر دستیاب ہے، جبکہ تمام اقسام کے چاول 20 سے 25 روپے اور ٹوٹا چاول 40 روپے فی کلو کم نرخ پر مہیا کیا جا رہا ہے۔
ڈپٹی کمشنر نے مزید کہا کہ 38 پرائس کنٹرول مجسٹریٹس رمضان المبارک کے دوران متحرک رہیں گے اور گراں فروشی کے خلاف سخت کارروائی کی جائے گی۔ انہوں نے بتایا کہ رمضان بازاروں میں شکایات مراکز، میڈیکل کیمپ، صفائی اور سکیورٹی کے بہترین انتظامات کیے گئے ہیں، جبکہ بزرگ اور معذور افراد کے لیے خصوصی سہولتیں بھی فراہم کی گئی ہیں۔
صحافی برادری نے رمضان بازار میں کیے گئے بہترین انتظامات پر ضلعی انتظامیہ کی کارکردگی کو سراہا۔
