بھارت کے غیر ذمہ دارانہ بیانات پر پاکستانی صحافیوں کی تشویش

ننکانہ صاحب،باغی ٹی وی( نامہ نگار احسان اللہ ایاز) جرنلسٹس ایسوسی ایشن آف پاکستان/یوکے (JAP/UK) نے بھارت کی جانب سے حال ہی میں سامنے آنے والے غیر ذمہ دارانہ اعلانات پر گہری تشویش کا اظہار کیا ہے۔ ان اعلانات میں سندھ طاس معاہدہ ختم کرنے، واہگہ بارڈر بند کرنے اور پاکستانی شہریوں کو 48 گھنٹوں میں ملک چھوڑنے کے مطالبات شامل ہیں۔

JAP/UK کے مرکزی صدر میاں عامر علی، مرکزی سیکرٹری محمد آصف قائمی، سیکرٹری فنانس اقبال قائم خانی، صدر JAP UK پاکستان سمیع اللہ عثمانی، سیکرٹری جنرل صائمہ صابر اور سیکرٹری فنانس راشد علی خانزادہ سمیت دیگر عہدیداران نے اپنے مشترکہ بیان میں کہا کہ سندھ طاس معاہدہ ایک بین الاقوامی سطح پر تسلیم شدہ معاہدہ ہے جس نے دونوں ملکوں کے درمیان پانی کی تقسیم کا توازن برقرار رکھا ہے۔ اس معاہدے کا یکطرفہ خاتمہ نہ صرف بین الاقوامی قانون کی صریحاً خلاف ورزی ہوگا بلکہ اس کے انتہائی سنگین نتائج بھی سامنے آ سکتے ہیں۔

بیان میں مزید کہا گیا کہ ایسے اقدامات سے دونوں ممالک کی عوام براہ راست متاثر ہوں گے۔ پانی جیسی بنیادی ضرورت کی فراہمی متاثر ہونے سے زرعی پیداوار، پینے کے پانی تک رسائی اور ماحولیات پر انتہائی منفی اثرات مرتب ہوں گے جو غریب اور متوسط طبقے کے لیے تباہ کن ثابت ہو سکتے ہیں۔ اسی طرح سرحدوں کی بندش اور سفارتی تعلقات میں کشیدگی دونوں ممالک کے طلبہ، مریضوں، تاجروں اور ثقافتی و سماجی روابط کو بری طرح متاثر کرے گی۔

جرنلسٹس ایسوسی ایشن آف پاکستان/یوکے نے دونوں ممالک سے پرزور مطالبہ کیا ہے کہ وہ ہوش مندی، تدبر اور تحمل کا مظاہرہ کریں اور تمام مسائل کو بات چیت اور سفارتی ذرائع سے حل کرنے کی کوشش کریں۔ تنظیم نے اقوام متحدہ اور دیگر بین الاقوامی اداروں سے بھی اپیل کی ہے کہ وہ اس خطرناک صورتحال کا سنجیدگی سے نوٹس لیں اور جنوبی ایشیا میں پائیدار امن کے قیام کے لیے اپنا فعال کردار ادا کریں۔