ننکانہ صاحب،باغی ٹی وی(نامہ نگاراحسان اللہ ایاز) لاہور گرامر سکول گورو نانک کیمپس کے زیر اہتمام سالانہ تقریب تقسیم انعامات منعقد کی گئی، جس کی صدارت اسکول کے ڈائریکٹر کرنل (ر) ممتاز چیمہ نے کی۔
تقریب کے مہمانِ خصوصی ڈپٹی کمشنر محمد تسلیم اختر راؤ اور سماجی و سیاسی رہنما مہر سہیل منظور گل تھے، جبکہ اسکول کی ڈائریکٹر حاجرہ ولید، پرنسپل تانیہ عدیل، ولید چیمہ، اساتذہ، والدین اور طلبہ و طالبات کی بڑی تعداد شریک ہوئی۔
اس موقع پر ننھے طلبہ نے مختلف موضوعات پر خوبصورت ٹیبلوز پیش کیے، جنہیں حاضرین نے بے حد سراہا اور دل کھول کر داد دی۔ تقریب میں طلبہ کے درمیان انڈور گیمز کے مقابلے بھی منعقد ہوئے، جن میں بچوں نے بھرپور جوش و خروش کا مظاہرہ کیا۔
مقررین نے تقریب سے خطاب کرتے ہوئے لاہور گرامر سکول کے ننکانہ صاحب میں قیام کو خوش آئند قرار دیا اور کہا کہ طلبہ کی شاندار کارکردگی اور خوداعتمادی اس بات کا ثبوت ہے کہ وہ ایک بہترین تعلیمی ماحول میں زیر تعلیم ہیں۔
تقریب کے آخر میں مختلف کلاسز میں نمایاں کارکردگی دکھانے والے طلبہ میں انعامات تقسیم کیے گئے، جبکہ کھیلوں کے مقابلوں میں کامیاب ہونے والے کھلاڑیوں کو بھی نوازا گیا۔
